1 Samuel 9 - Syin Chin Bible

Saul le Samuel Kimu

¹ Benjamin nam pan Kish a kici mihau, mihing thupi khat om hi; ama sia Abiel ta, Zeror ii tu, Becorath bangkua sung pan hi a, Aphiah ii phung sung mi ahi hi.

² Ama in Saul a kici tapa, a mealpha khang tungto khat nei hi. Saul sia Israel sungah ngual dang theampo sangin lu tun khat bang saang zaw a, a meal zongh phazaw hi.

³ Kish ii laate pawlkhat vakthap a, tua ahikom ama in Saul munah, “Naseamte khat taw ih laa va zong ta'n,” ci hi.

⁴ Amate in Ephraim mualtung ngam teng le Shalishah ngamkhawk sung teng zong uh a, a zon uh hang a mu bua uh hi; tua ahikom amate in Shalishah ngam khawk kaantan in pai lai ahihang a laa om ngawl hi; tuasia ciang Benjamin ngam zongh kaantan ahihang a mu peang bua uh hi.

⁵ Zuph ngamkhawk sung a thet uh ciangin, Saul in a naseampa munah, “Cia tawng, tua ahibuale ka pa sia laate huvau ngaisun nawn ngawlin eima atu thinngim tha tu hi,” ci hi.

⁶ A naseampa in, “Na om zii in! Hi khuapi sungah mi thiangtho khat om a, ngual in nasia takin thasia hi, banghang ziam cile ama ci theampo taangtung hi. Ama kungah pai tawng, ama in laate koisungah kimu thei tu ci in hong son thei tha tu hi,” ci in zo hi.

⁷ Saul in, “Ama kungah pai leang ama bang pia thei natu hi ziam?” ci hi. “Ih ip sungah an om nawn ngawl a, ama ih piak tu bangma om ngawl, hi ngawl ziam?” ci hi.

⁸ A naseampa in zo a, “Ngunn tang no khat nei khi hi, tuasia ama pia thei khi hi, tua hile a omna mun hong son tu hi,” ci hi.

^9-11 Saul in zo kik a, “Na ngaisutna pha hi! Pai tawng,” ci hi. Tua ahikom amate mi thiangtho pa ii teenna khua sungah pai uh hi. Amate khua suana mual ah a kaa tawto laitakin, tuitoai tu ngaknu pawlkhat taw kisi uh hi. Ngaknute munah, “A mukhol theipa khua sungah a om ziam?” ci in dongh uh hi. (Tua hun lai in kamsaangte sia a mukhol thei pa kici a, khat po in Pathian munah thu a dok nop ciang, “A mukhol thei pa kungah pai tawng,” ci uh hi.)

^12-13 Ngaknute in, “Om hi, ama sia noma mai hiat ma ah pai hi. Manlang le uhte pha lai tu nu hi. Khua sung na tum uh po ciang ama mu tu nu hi. Ama sia khua sungah tuni in hong theng hi, banghang ziam cile mipite in mualtung biaknatau ah sangaw biakpiakna nei nuam hi. Tua munah a kisam mite sia ama thet mateng an ne ngawl tu hi, banghang ziam cile ama in tua biakpiakna sia thupha a piak phot kul hi. Tu laitakin pai le uhte mual tungah an ne tu in a kaato ma in kimu thei tu nu hi,” ci uh hi.

¹⁴ Tua ahikom Saul le a naseampa khuapi sangah paitan a, a sung a tum uh ciang biakna munah zuan a, hong papai Samuel mu uh hi.

¹⁵ Topa in a zeini tu sia hunin Samuel tungah,

¹⁶ “Zing ciang tubang hunin Benjamin nam mihing khat na kungah hong puak tu khi hi, ka mi Israel te a ukpa tu in sathau na noai in, tuaciang ama in amate sia Philistine te khut sung pan suatak tu hi. Ka mite thuakna ka mu zo a, hu ngenin a auna ka za zo hi,” ci hi.

¹⁷ Samuel in Saul a mu ciang, Topa in ama munah, “Hisia pa sia kong sonsa sia hi. Ama in ka mite uk tu hi,” ci hi.

¹⁸ Tuasia ciang Saul sia kongkha hui ah a om Samuel kungah pai in, “A mukhol thei pa koi sungah teang ziam, hong son ta'n,” ci in dongh hi.

¹⁹ Samuel in, “Keima a mukhol theipa khi hi. Biakna mun ka mai ah pai vun. No nii sia tuni in kei taw an nekhawm tu nu hi. Zing ciang zingsang in nong dok teng theampo hong son tu khi hi, tua zawkciang na pai natu po ah hong paisak tu khi hi.

²⁰ Tu nung ni thum lai in a bo laate ahile thinngim heak in; tuate kimu zo hi. Ahizong, Israel mite ii a dei a lungngul mama sia akua ziam? Nangma ni hi — nang le na pa ii innkuan ahi hi,” ci hi.

²¹ Saul in zo a, “Kei sia Israel sungah nam nobel Benjamin nam pan khi hi, tuaciang ka bangkua sia tua nam sung pan a thupi ngawlbel hi. Tua ahiciang banghangin tubangin thu hong son ni ziam?” ci hi.

²² Tua zawkciang Samuel in Saul le a naseampa inndoi lian khat sungah tumpui a, leangna 30 khawng ii tona sabuai lu ah tosak hi.

²³ Samuel in an huan pa munah, sabak khat tuamkoi in ci a kong piak sia hong la ta'n,” ci hi.

²⁴ Tua ahikom anhuanpa in a deiteal a pheisa bak khat hong la in, Saul mai ah hong lui hi. Samuel in, “En in, hi sungah sabak nang atu a kikoituam sia om hi. Hisia ne in. Mihing ka samte taw tu laitak na neak tu in kong khealsiasak hi,” ci hi. Tuabangin tua ni in Saul sia Samuel taw an nekhawm hi.

²⁵ Biakna mun panin khua sungah a tuaksuk zawk uh ciang, amate in innkhum tungah Saul atu lupna vawtsak uh hi,

²⁶ tuaciang ama tua munah lum hi. Khuavak ciang Samuel in innkhum tungah Saul sam to a, “Tho in, na pai natu munah hong paisak tu khi hi,” ci hi. Saul tho in Samuel taw lampi zui in paikhawm hi.

Samuel in Ngam Ukpa tu in Saul Sathau noai

²⁷ Khua mong a thet uh ciang, Samuel in Saul munah, “Naseampa ei mai ah paisak in,” ci hi. Naseampa in amate nusia a, Samuel in, “Tawmvei no sung hi sungah na om zii in, Pathian ii hong cina teng hong son tu khi hi,” ci hi.