1 Samuel 7 - Syin Chin Bible

¹ Tua ahikom Kiriath Jearim mite in Topa Thuciamna Thingkuang sia la in, mualtung a teang Abinadab a kici pasal khat ii inn ah tun uh hi. Amate in a tapa Eleazar sia a keam tu in thiansua uh hi.

Samuel in Israel Uk

² Topa ii Thuciamna Thingkuang sia Kiriath Jearim ah khuangeipi om a, kum kul bang om hi. Hisia hun sung tawntung Israel te theampo in Topa tungah hu ngen in au uh hi.

³ Samuel in Israel mite munah, “Na thinsung theampo taw Topa sangah na kihei tu uh le, ngamdang pathiante le Astarte numeipathian ii limte na vawk siat uh kul tu hi. Topa tungah noma le noma kipum aapna nei vun a, ama bek bia vun, tuaciang ama in Philistine te khut sung pan hong suatak tu hi,” ci hi.

⁴ Tua ahikom Israel mite in Baal le Astarte ii milim theampo vawkin Topa bek bia uh hi.

⁵ Tua zawkciang Samuel in Israel te theampo Mizpah ah kisitua tu in sam a, hi bangin ci hi, “Tua munah no atu in Topa tungah thu ka ngen tu hi.”

⁶ Tua ahikom amate theampo Mizpah ah kikhawm uh hi. Amate in tui tawm toai a, Topa biakpiakna in tua tui sung in, tua ni bup an tang uh hi. Amate in, “Topa tungah maw zo khu hi,” ci uh hi. (Israel mite sungah kamtam kinialnate Samuel ii a khensakna mun sia Mizpah ahi hi.)

⁷ Israel te Mizpah ah kikhawm zo hi ci in Philistine te in a zaak ciang a kumpipa nga teng in a mite taw amate sim tu in kuan uh hi. Israel te in tua thu za in lau uh a,

⁸ tuaciang Samuel munah, “Philistine te kung pan hong hut natu Topa ih Pathian tungah thu ngen tawntung in,” ci uh hi.

⁹ Samuel in tuuno khat ngoin, a bupin hal a, Topa tungah sangaw biakpiakna nei hi. Tua zawkciang ama in Topa ii Israel te a hu natu thungen a, tuaciang Topa in a thungetna zo hi.

¹⁰ Samuel in sangaw biakpiakna a vawt laitakin, Philistine te in a sim tu in mai hong kaa uh hi; ahizong tuasia po ciang Topa in vantung panin amate tungah vanto keaksak hi. Amate sia a lungmang cip a, patau in tai uh hi.

¹¹ Israel te kuan in Mizpah pan Bethcar a thet dektak dong, Philistine te zuizen a, lampi ah thathat uh hi.

¹² Tua zawkciang Samuel in suangtum khat la in Mizpah le Shen kilaklaw ah phut in, “Topa in lam tawntung hong hu hi” ci in a min sia “Huna Suangpi” (Ebenezer ) vaw hi.

¹³ Tuabangin Philistine te in lel a, Samuel nuntak lai teng Israel ngam a sim tu Topa in khaam hi.

¹⁴ Ekron le Gath kilak law Philistine te ii a laak khuapi teng Israel te kipia kik ahiciang Israel te in a ngam theampo nga kik hi. Tuaciang Israel te le Canaan mite sung zongh ah ngal kilemna om hi.

¹⁵ Samuel in a nuntak lai teng Israel te uk hi.

¹⁶ Kum simin ama in Bethel, Gilgal, le Mizpah ah paikot in hi munte ah kamtam kinialnate thu khensak hi.

¹⁷ Tua zawkciang ama sia Ramah ah cia kik in, tua munah thukhenmang seam hi. Ramah ah Topa atu biaknatau khat saa hi.