1 Samuel 30 - Syin Chin Bible

Amalek te taw Kidona

¹ Ni nii zawkciang David le a mite Ziklag theng kik uh hi. Amalek te in Judah thangsang sim zo a, Ziklag sim uh hi. Amate in a khua haltham a,

² numei teng man hi; kuama that ngawl ahihang a nusiat uh ciang a kuama theampo paipui uh hi.

³ David le a mite hong thet uh ciang, a khua kihal tham sa in mu a, a zite, a tapate, a tanute kipaipui siat zo hi.

⁴ David le a mite kakap in, a tha bo vanek dong tawp ngawl uh hi.

⁵ David zite nii, Ahinoam le Abigail ngawngawn laaksak uh hi.

⁶ David sia tu in a thinngim mama hi, banghang ziam cile a mite a vekpi in a tate a bosua hu in a thin uh na mama a, amate in David suang taw denlup tu in tawng hi; ahihang Topa a Pathian in ama thinletna pia hi.

⁷ David in Ahimelech ii tapa thiampi Abiathar munah, “Ephod hong paipui tavun,” ci a, Abiathar in ama kungah paipui hi.

⁸ David in Topa tungah, “Tua hong simthamte ka del tu ziam? Amate ka man zo tu ziam?” ci in dongh hi. Ama in, “Del in; amate man zo lai tu ni hi, tuaciang a matte zongh suatak tu ni hi,” ci in zo hi.

⁹ Tua ahikom David le ama mi 600 teng hong kipan a, Besor Lui a thet uh ciangin amate pawlkhat tua munah taam hi.

¹⁰ David in mihing 400 taw paisuak a; a dang 200 teng lui kaan tu in toi lei ahikom nungah taam uh hi.

¹¹ David taw a kithua mite in Egypt te patangno khat ngam sungah mu in, David kungah paipui uh hi. Amate in an le tui tawm,

¹² theinga ngawm tawm le sapit ko ngawm bom nii pia uh hi. An a neak zawkciang a tha hong hat kik hi; ama in an ahizong tui ahizong a neak ngawl zawk ni thum hi zo hi.

¹³ David in, “Na topa akua hi a, koisung pan hong pai ni ziam?” ci in dongh hi. Ama in, “Kei Egypt te khat hi a, Amalek te khat ii sila ka hi hi. Ka topa in tu nung ni thum lai in ka ciina ahikom hong nusia hi.

¹⁴ Judah ngam thangsang ah a om Chereth te ngam le Caleb bee le phung te ii ngam teng simtham in, Ziklag sia ka hal tum uh hi,” ci in zo hi.

¹⁵ David in, “Tua hong simthamte kungah nong paipui tu ziam?” ci in dongh hi. Ama in, “Kei nong thalup ngawl natu le ka topa kungah nong aap ngawl natu Pathian min taw kamciam hong pia po lete, hong paipui tu khi hi,” ci hi.

¹⁶ Tuaciang ama in David sia amate kungah paipui hi. Tua a simthamte sia Philistia le Judah ngam pan a laak uh vanh tam mama te ai in poai khaam uh a, an ne, zu dawn in, mun theampo ah kithethaang uh hi.

¹⁷ A khuavak ni zing tuungin David in sim a, nitak dong kido uh hi. Kalaoh tung to in a tai khangno 400 simngawl kuama a suakta om ngawl hi.

¹⁸ David in Amalek te ii laak sa na theampo le a mat teng ama zite nii dongin suatak a;

¹⁹ bangma a sumsi om ngawl hi. David in a mite ii tapate, tanute le Amalek te ii laak sa na theampo nga kik hi.

²⁰ Ama in tuu hon le khui hon te zongh nga kik a; a mite in amate mai ah nganno theampo hawl a, tuaciang, “Hi teng David ii neisa hi!” ci uh hi.

²¹ Tua zawkciang David in Besor Lui ah tha zawm leih in nungsang ah a taam 200 te kungah pai kik hi. Amate sia David le a mite muak tu in hong pai a, tuaciang David in pha takin amate nukset hi.

²² Ahihang mihing mannung ngawl thusel pawlkhat in, “Amate ei taw hong kuan khawm ngawl ahiciang, ih vanh ngate hawm ngawl tu hi. Amate in a zite le a tate la in cia thei tu hi,” ci uh hi.

²³ Ahihang David in, “Ka suapuite awng, Topa ii hong piak vanhte tungtaang ah tuabangin ngamta thei ngawl tu nu hi! Ama in ei hong keamcing a, hong simthamte tungah zawna hong ngasak hi.

²⁴ No ii ci bang sia kuama in hong thukim pui thei ngawl tu hi! Ih vekpi a kibangin ih hawm kul tu hi: a kuama po nungsang ah vanhcing te zongh, ngalphual ah a kuante nga za ma nga tu hi,” ci in zo hi.

²⁵ David in hi thuthun vawt a, tuate Israel ngam ah tua hun pan kipan kizui tan hi.

²⁶ David in Ziklag ah hong heak kik ciangin, vanh a laakte pawlkhat sia a lawmte ahi Judah lampuite munah, “Hi sungah Topa ii ngalte vanh ka laaksak uh sung pan no atu letsong hi,” cisak in puak hi.”

²⁷ Ama in tua letsong sia Bethel khua mite, Judah thangsang ngam a om Ramah khua mite, tuaciang Jattir,

²⁸ Aroer, Siphmoth, Eshtemoa,

²⁹ le Racal khua mite; Jerahmeel bee le phung, Ken mite,

³⁰ tuaciang Hormah, Borashan le Athach,

³¹ le Hebron khua mite teng tungah puak hi. Ama in ama le a mite vaa kotna mun theampo ah tua letsong puak siat hi.