1 Samuel 28 - Syin Chin Bible

¹ Tua zawk tawmvei ciangin Philistine te in Israel sim tu in a ngalkapte uh khawmtua hi, tuaciang Achish in David munah, “Nang le na mite in kei sang pan ngal sim tu ci sia na tel sa hi,” ci hi.

² David in, “Hi mama hi. Kei na naseampa khi hi, tuaciang bang ciang vawt thei khi ziam ci sia nangma mama in nong mu tu hi,” ci in zo hi. Achish in, “Pha hi! A tawntungin keima hong cing pa kong suaksak tu hi,” ci hi.

Saul in Thaa sam thei khat Thu dongh

³ Tu in Samuel thi zo a, Israel theampo ama ii a nusiat hangin khuangai in, ama ii khua Ramah ah phum uh hi. Saul in aisaan theite le thaa sam theite theampo zawthawk thu taw Israel panin hawlkhia zo hi.

⁴ Philistine ngalkapte kikhawmtua a, Shunem khua hui ah ngiaphual saat uh hi; Saul in Israel te khawmtua in Gilboa Mual ah ngiaphual saat hi.

⁵ Saul in Philistine ngalkapte a mu ciang lau mama hi,

⁶ tua ahikom ama in Topa munah bang law tu khi ziam ci in dongh hi. Ahihang Topa in mang sung pan ahizong, Urim le Thummim tung pan ahizong, kamsaangte tung pan ahizong, a zo mama bua hi.

⁷ Tuasia ciang Saul in a uliante thupia a, “Thaa sam thei nupi khat va zong tavun, keima pai in thu dongh tu khi hi,” ci hi. Amate in, “Endor ah khat om hi,” ci in zo uh hi.

⁸ Tua ahikom Saul kimealseal a, puan dang silh in, khuazin zawkciang a mite nii taw tua nupi nu taw kisi tu in pai hi. Ama in, “Thaate tungah dongh in a, bang thu piang tu ziam hong son ta'n. A min kong law pasal khat ii thaa sam in,” ci hi.

⁹ Nupi nu in zo a, “Kumpipa Saul ngamtatna teng na heak siat sa hi a, Israel ngamsung panin aisaan theite le thaa sam theite theampo hawlkeak hi. Tua ahiciang, banghangin kei thaang hong sia in hong kithatlumsak tu ni ziam?” ci in zo hi.

¹⁰ Tuasia ciang Saul in kiciamna thiangtho khat vawt hi. Ama in, “A nungta Topa min taw kamciam hong pia khi hi, hisia na sep hu in daan hong kipia ngawl tu hi,” ci hi.

¹¹ “Akua thaa hong samsak tu khi ziam?” nupi nu in ci hi. Ama in, “Samuel” ci in zo hi.

¹² Tua nu in Samuel a mu ciang ciik au in Saul munah, “Banghang hong theam ni ziam? Nang Saul kumpipa ni hi!” ci hi.

¹³ “Lau heak in! Bang na mu ziam?” Kumpipa in ci hi. Nupi nu in, “Thaa khat sia lei panin hong pai to ka mu hi,” ci in zo hi.

¹⁴ Ama in, “Tuasia bang taw kibang ziam?” ci in dongh hi. “Pasal huai khat hong pai to hi. Ama in puantual tungsilh silh hi,” ci in nupi nu in zo hi. Tuasia ciang Saul in Samuel hi ci in he a, ama a zatakna in lei ah bok hi.

¹⁵ Samuel in Saul munah, “Banghangin kei hong nawngkaisak ni ziam? Banghangin hong pai kiksak ni ziam?” ci hi. Saul in, “Ngimna lianpi sungah om khi hi! Philistine te sia kei ngalin hong pang hi, tuaciang Pathian in kei hong nusia hi. Ama in kamsaangte tungtawn ahizong, mang tungtawn ahizong ka thudok hong zo nawn ngawl hi. Tua ahikom bang vawt tu khi ziam nong son natu nang hong sam khi hi,” ci in zo hi.

¹⁶ Samuel in, “Topa in nang hong nusia zo a, na ngal a sua zawk nungsang, banghangin kei hong sam ni ziam?

¹⁷ Topa in kei tungah hong sonsa bangma in ama in nang tungah hong seam zo hi: ama in kumpi ngam sia na khut sung pan la keakin David hong piaksak zo hi.

¹⁸ Nangma in Topa thupiak ni ngawlin, Amalek te le a neisa theampo a vaikhua in susia cip ngawl ni hi. Tua hu in Topa in hisia tu in nang tungah hong vawt hi.

¹⁹ Topa in nang le Israel sia Philistine te khut sungah hong aap tu hi. Zing ciangin nang le na tapate in kei kung nong theng tu uh a, Topa in Israel ngalkaphonpi zongh Philistine te aap tu hi,” ci hi.

²⁰ Samuel ii pau teng hu in thakhat ma in Saul puksuk a, lau leilam in lei ah kithuang hi. Ama sia ni bup le zan tawntung bangma neak nei ngawl ahikom in a tha zawm hi.

²¹ Nupinu in ama kungah hong pai in lau ngawpin om a mu ciang, “Topa awng, nong hesuakna in ka luang aitaa in, nong sawl teng hong vawtsak khi hi.

²² Tu in nong hesuakna in kong nget bangin hong ngamta ta'n. Nang atu an tawm kong vawtsak tu hi. Na khualhaw thei khom natu na thahat natu in an na neak kul tu hi,” ci hi.

²³ Saul in bangma ne ngawl tu khi hi ci in nial hi. Ahihang a uliante zongh in ama an ne in sawl uh hi. A khakbel ciang ama in zawp in lei pan tho to a, lupna tungah hong to hi.

²⁴ Nupinu in a thau tu in a vaak top khuino sia ngo hi. Tuaciang ama in anvui pawlkhat la a, tol saw ngawl anluum in hong em hi.

²⁵ Ama in Saul le a uliante mai ah a an lui a, amate in ne uh hi. Amate tua zan ma in ding kik uh hi.