1 Peter 5 - Syin Chin Bible

Pathian Tuuhon

¹ Pawlpi upa khat ahi keima in no pawlpi upate tungah kong thuum hi. Keima sia Christ thuakna ii tetti khat ka hi a, maisang hong kilangh tu minthanna a nga tu khat ka hi hi.

² Uuk ngawl pipina taw hi ngawlin Pathian hong deisak bangin, uukna takpi taw Pathian hong piak tuuhonte keam tavun ci in kong thuum hi. Na nasep uh sia thasum saan natu lel hi ngawlin, uukna takpi taw a seam hi tavun.

³ Noma ii kep tu a hong ki aapte tungah zawthawkna taw uk tu hanciam ngawlin, tuuhon atu in a ettee pha na hizaw vun.

⁴ Tuaciang Tuucing Pipa hong kilangh ciangin, a taanna a bo ngeingawl tu minthanna lukhu na saang tu uh hi.

⁵ Tuasia bangma in no khangmoizawte zongh, khanghaamzawte thu na ni vun. Tuaciangin note theampo khat le khat, na na kisepsak thei natu in, kiniam khiakna awmdal sia puan bangin silh tavun; banghang ziam cile, laithiangtho in, “Pathian in a kiphasakte nalh a, a kiniamkhiakte tungah maipha pia hi,” ci hi.

⁶ Pathian ii thahatna khutnuai ah kiniamkhiak vun, tua hile ama ii hunpha hong tun ciangin ama in hong laamto tu hi.

⁷ Ama in note hong thinnuam maw ahikom, na thinngimna theampo ama aap vun.

⁸ Pilvang vun a, encik vilvel vun! Na ngalpa Doaimangpa sia a valhlup tu khat po zong a, a hawk tawpi taw kibangin, na kiimkot ah hong vak kawkoai hi.

⁹ Na upna sungah kip vun a, ama na nalh vun, banghang ziam cile, leitung theampo a om na thu uppuite zongh a kibang ngimnate thuak hi.

¹⁰ Ahihang tawmvei na thuak zawk uh ciangin, Christ taw pumkhat hina taw, ama ii a bomaw minthanna nga tu a hong sam, thuthiamna theampo ii Pathian, ama mama in no hong cialcingsak tu a, kipsakna, thahatna le, bul khona hong pia tu hi.

¹¹ Ama tungah vaangletna om tawntung tahen! Amen.

A khakbel Vaithakna

¹² A thumaan Tapidaw suapui in ka ngaisut Silas ii hong huna taw, hi lai tomno kong at hi. Hi thu sia Pathian ii thuthiamna tatak hi ci in tetti pangin, kong hanthawn hi. Tua thu sungah kho takin ding vun.

¹³ Pathian teal ahi, Babylon khua ah a om, na pawlpike ii hong paupui bangma in ka tapa Mark zongh in hong paupui hi.

¹⁴ Tapidaw ki it kinapna taw khat le khat kimuak tavun. Christ neisa ahi note theampo tungah thinnopna hong om tahen.