Biblia Todo Logo
Bìoball air-loidhne

- Sanasan -

1 Peter 4 - Syin Chin Bible


A kikheal Nuntaknate

1 Christ in a pumpi ngim thuak ahikom in, note zongh ama khua ngaisutna bangma nei in noma le noma na kithahatsak nanak vun; banghang ziam cile a kuama po pumpi taw a thuak sate sia, mawna sungah a tualta nawn bua hi.

2 Tua ahikom tu pan kipanin, na leitung nuntakna uh a om laiteng, mihing ii deinate in uksak heak vun a, Pathian ii deina in uksak hamtang vun.

3 A bosa hun sungah Pathian he ngawlte ii sep nop teng, a khomin seam zo nu hi. Na nuntakna uh sia, zummawk ngamtatna, sikvilna, zu khamna, uangtatna, zuneakna, a thasiathuai milim biaknate taw zangh zo nu hi.

4 Tu in Pathian he ngawlte in amate sansak po maitat, loklenna sungah na kihel nop nawn ngawl uh ciang, lamdang sa in note hong selno uh hi.

5 Ahihang a nungtate le a thisate tungah thukhen tu in a kingingta sa Pathian mai ah amate in thusitna thuak tu uh hi.

6 Mihing khat sim tungah, thu kikhen ahi bangma in, amate pumpi nuntakna tungah thu a kikhen sa hi a, a thite zongh Lungdamna Thupha a kihilna sia, tua thu hang ahi hi; amate thaa nuntakna sungah Pathian nuntak bangin, a nuntak thei natu thu a kihil ahi hi.


Pathian Letsong A zeak Thiamte

7 Na theampo a bo natu hun hong nai zo hi. Thu na nget thei natu in noma le noma ki uk thiamin, na pilvang tavun.

8 Khat le khat thinsung takpi taw na ki it tu sia thupi ngaisutbel tavun, banghang ziam cile ki itna in mawna tam mama sincip hi.

9 Phun ngawlin khat le khat zin kido thiam tavun.

10 Mihing sim in Pathian letsong tuatuamte a zeak thiampa bangin, Pathian tung pan a tuam vilvel na saan uh letsongte sia ngualdangte phattuam natu in zangh hamtang vun.

11 Thuhil pawpo in Pathian ii ngupna thute hil nanak tahen a; na theampo ah Jesus Christ tungtawnin Pathian tungah pokna a kipiak thei natu in, na a seam pawpo in Pathian piak thangui thatang taw seam nanak tahen, tua Pathian tungah minthanna le vaangletna a tawntung a tawntungin om tahen. Amen.


Tapidaw khat hina taw Thuakna

12 Ka it lawmte awng, a haksa ze etna na thuak uh hu in, lamdang sa heak vun, a piang ngeingawl thute no tungah hong piang bangin ngaisun heak vun.

13 Christ ii vaangletna hong kilangh ciangin, lungdamna a cingin na nga thei natu in, ama thuaknate thuakpui na hi uh komin, lungdam zaw tavun.

14 Christ ii nungzui na hi uh hu in hong kizawngsak ahile, na lungdam tu uh hi; tua in a vaanglian Thaa ahi Pathian Thaa Thiangtho in no tungah a om hang ahi hi.

15 Note sungah khat po in ngimna a thuak le zong, ama sia mihing a that, a nguta, khialna lian a vawt, tua ahibuale, midang a kamkup nop hu hi heak hen.

16 Ahizong Tapidaw na hi uh hu in a thuak na hi uh le, maizum in nei heak vun, Christ minpu na hi uh hu in, Pathian tungah lungdamko tavun.

17 Thukhen kipat tu hun hong tung zo a, Pathian aituam mihingte sia thu kikhen masa tu hi. Eite taw hong pan le Pathian kung pan hong pai Lungdamna Thupha a um ngawlte bang suak thong tu ziam?

18 Laithiangtho in: “Miphate a kingup tu haksa hi; tua ahile Pathian a sel mawneite bang suak tu ziam?” ci hi.

19 Tua ahiciang Pathian ii deina a om hu in a thuakte ahile, a kamciam a peal ngeingawl, amate a Bitphuapa sungah, a ngamtat phatnate taw amate le amate kipummuan tahen.

Siyin Chin Bible © Bible Society of Myanmar, 2016

Bible Society of Myanmar
Lean sinn:



Sanasan