1 Kumpite 15 - Syin Chin Bible

Judah Kumpipa Abijah

¹ Israel kumpipa Jeroboam ii maan zawk a kum sawm le liatna ciangin Abijah sia Judah kumpipa suak a,

² tuaciang, ama in Jerusalem panin kum thum sung uk hi. Ama ii nu sia Absalom ii tanu Maacah ahi hi.

³ Ama in a pa ii a vawt mawnate ma vawtin, a pu selawn David bangin Topa a Pathian tungah thumaan siat zo ngawl hi.

⁴ Ahihang David hangin Topa a Pathian in ama zawkciang Jerusalem a uk tu le Jerusalem ngammuangsak tu in Abijah sia tapa khat pia hi.

⁵ Topa in hi bangin a vawt sia banghang ziam cile David in ama ii lungkimte bek seam a, Hit mi Uriah taw a vai khat simngawl po, a thukham peuma zui ngawl nei ngeingawl hi.

⁶ Abijah ii khan hunsung theampo ma Rehoboam le Jeroboam ii hun pan a kipan kidona sia kizom suak lai hi.

⁷ Tuaciangin Abijah ii sep le vawt dangte theampo sia Judah Kumpipate Taanghthu sungah kikhum siat hi.

⁸ Abijah thi in David Khuapi sungah kiphum hi, tuaciang a tapa Asa in ama kumpi za laih hi.

Judah Kumpipa Asa

⁹ Israel kumpipa Jeroboam ii maan zawk a kum kul na ciangin Asa sia Judah kumpipa suak hi,

¹⁰ tuaciangin ama in Jerusalem ah kum 41 sung uk hi. A pi sia Absalom ii tanu Maacah ahi hi.

¹¹ A taanghpupi David ii ngamtat bangin Asa in Topa lungkim tu in ngamta hi.

¹² Ama in ngamsung panin numei le pasal pumpi zuak a, doai biakna munte ah a om theampo hawlkhia hi, tuaciang ama ii mai ah a seamte ii vawt milim theampo heam hi.

¹³ Ama in a pi Maacah sia, kumpinu ii nu a hina panin heam hi, banghang ziam cile ama in ta tam nei natu a siam Asherah numeipathian ii a kiihuai milim khat vawt hi. Asa in tua milim sia sattan in Kidron kuam ah hal hi.

¹⁴ Asa in doai biakna mun theampo susia ngawl ahihang Topa tungah a nuntak tawntung thumaan top hi.

¹⁵ Biakinnpi sungah a pa ii Pathian atu a piaktuam na teng le khamh le ngunn taw a kivawt ama ii piaktuam nate zongh koi hi.

¹⁶ Judah kumpipa Asa le Israel kumpipa Baasha sia vaang a nei uh lai teng in kido tawntung hi.

¹⁷ Baasha in Judah sim a, Judah ngam pan a pusuak a sungtang thei te theampo a khatan natu in Ramah sia kulh taw uum hi.

¹⁸ Tua ahikom Kumpipa Asa in Biakinnpi le kumpi inn sung a khamh le ngunn a om laiteng la in Damascus ah, Tabrimmon ii tapa, Hezion tupa, Syria kumpipa Benhadad kungah a uliante pawl khat in puaksak a, hi bang kam teng taw thaak hi:

¹⁹ “Ih pate sia ngal a kipawl ahi bangma ei zongh kipawl khawm tawng. Hi ngunn le khamhte sia nangma atu letsong kong piak hi. Tu in ka ngamsung pan a ngalkapte a laak kik nanak natu in, Israel kumpipa Baasha taw na kipawl na sia na pheltan in,” ci hi.

²⁰ Benhadad kumpipa in Asa ii ci teng thukim a, Israel khuapite sim tu in ngalkap ukte le ngalkaphonpite kuansak hi. Amate in Ijon, Dan, Abel Beth Maacah, Galilee Tuili hui ngam teng, Naphtali ngam bup la hi.

²¹ Kumpipa Baasha in thupiang teng a zaak ciang Ramah khua ah a kulhpi vawt teng tawpin Tirzah zuan hi.

²² Tua zawkciang Kumpipa Asa in Judah ngam bup ah khat zongh kikhe ngawlin, Baasha ii kulh vawtna a zak suang le thingte Ramah panin puasiat tu in thupia hi. Asa in Mizpah le Benjamin ngam ah Geba khuapi sia hi vanhte taw ngalnanna kulh in vawt hi.

²³ Asa ii a sep a vawt dang theampo, a hanna le kulh a vawt khuate ii thu teng Judah Kumpipate ii Taanghthu sungah kikhum hi. Ahihang a khanhaam ciangin ama sia peang natna taw zawcip hi.

²⁴ Asa thi a, David Khuapi sung kumpi thaan ah kiphum hi, tuaciang a tapa Jehoshaphat in a kumpi za laih hi.

Israel Kumpipa Nadab

²⁵ Judah kumpipa Asa ii maan zawk a kum niina hun sungah Kumpipa Jeroboam ii tapa Nadab sia Israel kumpipa hong suak a kum nii sung uk hi.

²⁶ Ama ii mai ah a pa bangma in Topa tungah ama maw a, Israel te mawna sungah lampui hi.

²⁷ Issachar nam Ahijah ii tapa Baasha in Nadab thasawm in, Nadab le a ngalkaphonpi in Philistia ngam Gibbethon khuapi a uumci laitakin ama thatlum hi.

²⁸ Hi thu sia Kumpipa Asa ii Judah ah a maan zawk a kum thumna sungah piang hi. Tua bangin, Baasha in Nadab ii Israel kumpi za laih hi.

²⁹ Thakhat thu in ama in Jeroboam ii innkuanpuite that siat hi, Shiloh pan kamsaang pa Ahijah ii Topa kammal a sonsa bang tatakin Jeroboam ii innkuanpui teng that siat a; khat zongh khe ngawl hi.

³⁰ Hi bang a pian sia banghang ziam cile Jeroboam in Israel ii Pathian Topa sia ama mawna hang le Israel mite mawna a vawtsak hu in thin uuksak ahi hang hi.

³¹ Nadab ii a sep a vawt dang theampo sia Israel Kumpite ii Taanghthu sungah kikhum hi.

³² Judah kumpipa Asa le Israel kumpipa Baasha te ngeal sia a vaang nei uh lai teng khat le khat kido tan uh hi.

Israel Kumpipa Baasha

³³ Judah kumpipa Asa ii maan zawk a kum thumna ah Ahijah ii tapa Baasha sia Israel kumpipa suak a, Tirzah panin kum 24 sung uk hi.

³⁴ Ama ii mai ah Kumpipa Jeroboam bangma in Topa tungah ama maw a, Israel te mawna sungah lampui hi.