1 Khangtaanghthu 5 - Syin Chin Bible

Reuben ii Suan le Paalte

¹ Hite sia Jacob ii tapa lianbel Reuben ii suan le paalte ahi uh hi. (Reuben in a pa zinote khat khialpui ahikom taciil ii innlua za taan in, a lua tu teng sia Joseph kipia hi.

² Ahizong Judah nam sia a hatbel hi a, a nam theampo atu ukpa khat ii pianna ahi hi.)

³ Jacob ii tapa lianbel Reuben in tapa li nei hi: Hanoch, Pallu, Hezron, le Carmi te ahi hi.

^4-6 Hite sia khang khat zawkciang khang khat Joel ii suan le paalte ahi hi: Shemaiah, Gog, Shimei, Micah, Reaiah, Baal, le Beerah te ahi hi. Assyria kumpilianpa Tiglath Pileser in a nam lampuipa Beerah manin a ngam pan mun dangah hawlkhia hi.

⁷ Reuben nam sungah a nuai a, bee le phung lampuite min teng innkuan khangngui sungah kiciamtee hi: Jeiel, Zechariah,

⁸ tuaciang, Azaz ii tapa, Shema ii tupa Bela hi a, ama sia Joel ii bee le phung pan ahi hi. Hi bee le phung sia Aroer khua le a saksang Nebo le Baal Meon ngam sungah teang uh hi.

⁹ Amate in Gilead ngam ah nganno honpite nei ahikom Euphrates ngundung suk theampo, nisuana sang sennealngam dongin sungsuam uh hi.

¹⁰ Saul kumpipa hun sung Reuben namte in Hagri te ngal sungah a thalup zawkciang Gilead nisuana sang amate ngam teng la uh hi.

Gad Suan le Paalte

¹¹ Gad minamte sia Reuben namte ii teenna saksang Bashan ngam sungah nisuana sang Salecah dongin teang uh hi.

¹² Joel sia a puiding bee le phung pianna hi a, Shapham sia bee le phung a thupibel a niina sia ii pianna ahi hi. Janai le Shaphat te sia Bashan ngam ah a teang bee le phung dangte ii pian nate ahi uh hi.

¹³ Tua Gad nam sung pan bee le phung dang salite a nuai a bang ahi hi: Michael, Meshullam, Sheba, Jorai, Jacan, Zia, le Eber te ahi uh hi.

¹⁴ Amate Huri ii tapa Abihail ii suan le paalte hi in, a taanghpupite a nuai a bang ahi hi: Abihail, Huri, Jaroah, Gilead, Michael, Jeshishai, Jahdo, Buz te ahi hi.

¹⁵ Abdiel ii tapa, Guni ii tupa Ahi sia hi bee le phungte ii lutang ahi hi.

¹⁶ Amate Bashan le Gilead ngamsung khua teng le Sharon ngam nganthana munte theampo ah teang uh hi.

¹⁷ (Hi thu tepteenate sia Judah kumpipa Jotham le Israel kumpipa Jeroboam II khan lai in a kikaikhawm thute veu hi.)

Nisuana sang Minamte ii Ngalkapte

¹⁸ Reuben, Gad le Manasseh nisuana sang minamte sungah lum, namsau, le thal a zanghthiam ngalkap 44,760 om hi.

¹⁹ Amate in Jetur, Naphish le Nodab nam ahi Hagri minamte sim uh hi.

²⁰ Amate in Pathian muangin a huu natu thungen ahikom Pathian in a thu ngetna sang a, Hagri le a pawlte zosak hi.

²¹ Amate in ngalte ii kalaoh 50,000, tuu 250,000, le laa 2000 matsakin ngalte 100,000 man uh hi.

²² Tua ngal simna sia Pathian ii deina ahikom amate in ngalte tam mama that uh hi. Amate sia saltaang tu in a kipaipui dong tua ngam ah teang suak uh hi.

Manasseh Nisuana Sang Mite

²³ Manasseh Nisuana sang mite sia Bashan ngamsung saksangah Baal Hermon, Senir, le Hermon mual dongin teang a, pung mama uh hi.

²⁴ Amate ii bee le phung lutangte sia: Epher, Ishi, Eliel, Azriel, Jeremiah, Hodaviah le Jahdiel te ahi hi. Amate theampo sia ngalkap mindok tuam te le bee le phung lampui minthangte ahi hi.

Nisuana Sang Minamte Kihawlkeak

²⁵ Ahihang hi mite in a taanghpupite ii Pathian tungah thumaan ngawlin a ngam pan Pathian ii a nawkeak minamte ii pathiante bia tu in Pathian taisan uh hi.

²⁶ Tua ahikom Pathian in Assyria kumpilianpa Pul (Tiglath Pileser zong kici) in a ngam simsak hi. Pul kumpipa in Reuben, Gad, le Manasseh Nisuana sang minam teng notkeak a, Halah, Habor, le Hara, tuaciang Gozan ngunhui ah teang suaksak hi.