1 Khangtaanghthu 24 - Syin Chin Bible

Thiampite A kiseesiat Nasep

¹ Aaron suan le paalte sia hi bangin a pawlin kikhen hi. Aaron in tapa li nei a: Nadab, Abihu, Eleazar, le Ithamar te hi.

² Nadab le Abihu sia a pa thi ma in thi a, suan le paal nei ngawl ahikom a suapuite Eleazar le Ithamar thiampi suak hi.

³ David kumpipa in Aaron suan le paalte sia amate nasep taw kizui in a pawlin khen hi. Hi nasep khenna ah ama sia Eleazar ii suan Zadok le Ithamar ii suan Ahimelech in hu hi.

⁴ Eleazar ii suan le paalte sia pawl sawm le pawl luk in kikhen a, Ithamar ii suan le paalte sia pawl liat in kikhen hi; hi bangin a khen sia Eleazar ii suan le paalte sungah bangkua sim pan pasal tamzaw ahihang hi.

⁵ Eleazar le Ithamar ii suan le paalte sungah biakinn uliante le thaa lamsang lampuite om ahikom lai meetang sawk in nasep hawm hi.

⁶ Eleazar le Ithamar suan le paalte abaan abaan in lai meetang sawk hi. Tua zawkciang amate min sia Levi mi thuzeakpa, Nethanel tapa Shemaiah in lai taw ciamtee hi. Kumpipa, a uliante, thiampi Zadok, Abiathar tapa Ahimelech, thiampi innkuante le Levi mi innkuante ii lutangte sia tetti te vive hi siat hi.

^7-18 Hi sia innkuan pawl 24 te nasep kipiakna hi a: 1. Jehoiarib 2. Jedaiah 3. Harim 4. Seorim 5. Malchijah 6. Mijamin 7. Hakkoz 8. Abijah 9. Jeshua 10. Shecaniah 11. Eliashib 12. Jakim 13. Huppah 14. Jeshebeab 15. Bilgah 16. Immer 17. Hezir 18. Happizzez 19. Pethahiah 20. Jehezkel 21. Jachin 22. Gamul 23. Delaiah 24. Maaziah te ahi hi.

¹⁹ Hi mite sia Israel te Topa Pathian ii thupiak a zui na in a taanghpupi Aaron ii nasep tuatuam a omsak na bang in Biakinnpi ah pai tu le vaipuakte a sep natu a kisee na zui in a min uh kiciamtee hi.

Levi te Min Sazian

²⁰ Hite sia Levi suan innkuan dangte ii lutangte hi a: Shebuel panin Amram ii suan Jehdeiah;

²¹ Rehabiah ii suan Isshiah;

²² Shelomith panin Izhar ii suan Jahath;

²³ Hebron tapate sung pan a piankum zui in Jeriah, Amariah, Jehaziel, le Jekameam;

²⁴ Micah panin Uzziel ii suan Shamir;

²⁵ Micah suapuipa Isshiah panin Uzziel suan Zechariah;

²⁶ Merari suan le paalte ahi Mahli, Mushi, le Jaaziah te ahi hi.

²⁷ Jaaziah in tapa thum nei a: Shoham, Zaccur le Ibri te ahi hi.

^28-29 Mahli in tapa nii Eleazar le Kish nei hi. Eleazar in tapa nei ngawl ahihang Kish in tapa khat, Jerahmeel nei hi.

³⁰ Mushi in tapa thum nei a: Mahli, Eder, le Jeremoth te ahi hi. Hiteng sia Levi te ii innkuante hi.

³¹ A mealheakte, Aaron suan thiampite ii a vawt bangma in naseam tu a see ciang innkuan sim pabel le a nau pate khat in lai meetang sawk hi. David kumpipa, Zadok, Ahimelech, tuaciang thiampi te le Levi te ii innkuan pabelte sia a tetti te ahi hi.