1 Khangtaanghthu 20 - Syin Chin Bible

David in Rabbah La

¹ Kumpite ii ngalsim hun veu ahi khuakhaal hun a thet kik ciang Joab in ngalkaphonpi lampui in Ammon ngam sim uh hi; ahizong David kumpipa sia Jerusalem ah om hi. Amate in Rabbah khuapi uumci in sim a, lalcipsak hi.

² Ammon te biak milim Molech in kilogramme 34 bang a ngit khamh kumpilukhu khat nei hi. Tua ii sungah suangmanpha khat om a, tuasia David in la in ama kumpilukhu tungah suang hi. Ama in khuapi sung pan vanh a laakte honpi khat zongh ciapui hi.

³ Ama in khuapi sung mite paipui in thingatnam, thik tumanh, le heite taw na seamsak hi. Ammon ngam khua dangte theampo ah a om mite zong tuabang ma in seamsak hi. Tua zawkciang ama le a mite Jerusalem ah heak kik uh hi.

Philistine Thatang Liante taw Kisimnate

⁴ Tawmvei zawkciang Philistine te taw Gezer ah ngal kidona om kik hi. Tua tungin Hushah pan Sibbecai in a thatang lian Sippai a kici pa thatin, Philistine te zo hi.

⁵ Philistine te taw ngal kisimna dangkhat om kik in, Jair ii tapa Elhanan in Gath pan Goliath suapuipa Lahmi that hi. Lahmi ii a tei sia thiamtana pumlawng cia saa hi.

⁶ Gath ah khatvei ma ngal kisimna khat om in, tua khua sungah a khut te nii ah khutme luk veve, a peang te nii ah peangme luk veve a nei thatang lian khat om hi. Ama sia nidang lai in mihing thatang liante suan khat hi.

⁷ Tua pa in Israel te nalh ahikom David ii suapuipa Shammah ii tapa Jonathan in thatlum hi.

⁸ David le a mite ii a thalup hi mihing thumte sia Gath khua ah a om thatang liante ii suan le paalte ahi uh hi.