1 Khangtaanghthu 18 - Syin Chin Bible

David ii Ngalzawnate

¹ Hun tawmvei zawkciang David kumpipa in Philistine te sim kikin zo hi. Ama in amate ii a uk Gath khuapi le a kiim ah khuanote la hi.

² Moab te zongh zo a, a khutnuai suak in David tungah shia pia uh hi.

³ Tua zawkciang David in Syria ngamsung Zobah ngam ukpa Hadadezer kumpipa sia Hamath ngam nai na ah sim hi. Banghang ziam cile ama in Eupharates ngunnaak sangah a om ngam sia uk tu hanciam hi.

⁴ David in a siphu ngalleang tulkhat, siphu ngalkap 7,000 le lei ngalkap 20,000 man hi. Ama in leang zakhat kai tu siphu kisam za khe in a dangte theampo a peangbaisak siat hi.

⁵ Damascus ah a om Syria te in Hadadezer kumpipa hu tu in a ngalkaphonpi a paisak ciang, David in simin, 22,000 thatlum hi.

⁶ Tua zawkciang ama in amate ii ngam sungah ngalkap ngiaphualte saat a, amate a khutnuai suaksakin phiangshia piasak hi. Topa in David sia mun theampo ah zawna pia hi.

⁷ Hadadezer ii uliante puak khamh ngaldalna lumte David in matsakin Jerusalem ah ciapui hi.

⁸ Ama in Hadadezer ukna Tibhath le Kun khuapite panin taau tam mama zongh la hi. (Solomon in a khaksang ciang, tuate taw Biakinnpi atu kuang le beal te, khuam te le tuikuang vawt hi.)

⁹ David in Hadadezer ii ngalkaphonpi bup zo siat ci thu Hamath kumpipa Toi in za hi.

¹⁰ Tua ahiciang David kumpipa muak tu le Toi ii tamvei mama a sim bul Hadadezer a zawna lungdamko tu in ama in a tapa Joram paisak hi. Joram in khamh, ngunn, le taau taw a kivawt letsongte David puak hi.

¹¹ Tua te sia David kumpipa in a zawthal ngamte — Edom, Moab, Ammon, Philistia le Amalek pan a laak ngunn le khamhte taw biakna ah zak tu in aap khawm hi.

¹² A nu Zeruiah ahi Abishai in Ci Kuam ah Edom te zo in 18,000 that hi.

¹³ Ama in Edom ngamsung theampo ah ngalkap ngiaphualte saat in tua munah a teang mite David kumpipa khutnuai suak hi. Topa in David sia mun theampo ah ngalzosak hi.

¹⁴ David in Israel ngam bup ukin, a mite a tawntungin a kilawm bang le thumaan thutang taw a kithupi vawt natu in vaihawmsak hi.

¹⁵ Abishai ii suapui pa Joab sia ngalkaphonpi ukpa; Ahilud ii tapa Jehoshaphat sia thu theampo tepteena ukpa;

¹⁶ Ahitub ii tapa Zadok le Abiathar ii tapa Ahimelech te in thiampi; Seraiah in zum thuzeakpi;

¹⁷ Jehoiada ii tapa Benaiah sia David a cingte ukpa; tuaciang David kumpipa tapate in a kumpi sepna sungah a za lian te ahi uh hi.