1 Khangtaanghthu 15 - Syin Chin Bible

Thuciamna Thingkuang Khiin tu Kithoai

¹ David in ama aituam zak tu in David khuapi sungah innte sa hi. Ama in Pathian ii Thuciamna Thingkuang atu in mun khat vawtin puanbuk khat zongh saksak hi.

² Tuaciang David in, “Thuciamna Thingkuang sia Levi te bek in pua thei tu hi, banghang ziam cile amate sia Pathian in Thuciamna Thingkuang pua tu le a tawntung ama ii na a seam tu in a tealsa te ahi uh hi,” ci hi.

³ A vawt kholsa munah Thuciamna Thingkuang paipui tu in David in Israel mite theampo Jerusalem ah sam hi.

⁴ Tua zawkciang ama in Levi te le Aaron suan le paalte sam hi.

⁵ Levi te Kohath bee le phung sung pan ama ii mihing 120 a uk Uriel hong pai hi;

⁶ Merari bee le phung sung pan mihing 220 a uk Asaiah hong pai hi;

⁷ Gershon bee le phung sung pan mihing 130 a uk Joel hong pai hi;

⁸ Elizaphan bee le phung sung pan mihing 200 a uk Shemaiah hong pai hi;

⁹ Hebron bee le phung sung pan mihing 80 a uk Eliel hong pai hi;

¹⁰ Uzziel bee le phung sung pan mihing 112 a uk Amminadab hong pai hi.

¹¹ David in thiampi Zadok le Abiathar le Levi mi luk ahi Uriel, Asaiah, Joel, Shemaiah, Eliel le Amminadab te sam hi.

¹² Ama in Levi te tungah, “Note sia Levi bee le phung lampuite na hi uh hi. Ka vawt kholsa munah Israel Topa Pathian ii Thuciamna Thingkuang na paipui thei natu uh in noma le noma kithiansua vun a, na Levi mipuite zongh thiansua vun.

¹³ A masa lai in tua munah Thuciamna Thingkuang pua tu in nong om bua uh a, ama ih biak tu bangin ih biak ngawl hu in, Topa ih Pathian in eite daan hong pia hi,” ci hi.

¹⁴ Tua zawkciang Israel te Topa Pathian ii Thuciamna Thingkuang khiin tu in thiampite le Levi te amate le amate kithiansua uh hi.

¹⁵ Moses tungtawnin Topa thupiak bangin Levi te in Thuciamna Thingkuang sia a liangko tungah molte taw zawngin pua uh hi.

¹⁶ David in Levi te lampuite tungah lungdamna lasa tu, tengtongh tum tu, daalkopsai tum tu, Levi mi tuatuamte a see tu in thupia hi.

^17-21 Amate in lasa te ii bee le phungte sung pan taau daalkopsai tum tu in a nuai a mite teal a: Joel ii tapa Heman, a beepa Berechiah ii tapa Asaph, le Merari bee le phung pan Kushaiah ii tapa Ethan te ahi hi. Amate in tuate a hu tu in a nuai a Levi te, tengtongh aw eute tum tu in teal a: Zechariah, Jaaziel, Shemiramoth, Jehiel, Unni, Eliab, Maaseiah, le Benaiah te ahi hi. Tengtongh aw unte tum tu in amate in a nuai a Levi te teal a: Mattithiah, Eliphelehu, Mikneiah, Azaziah, le biakinn cingte Obed Edom, le Jeiel te ahi hi.

²² Music a thiam hu in Chenaniah sia Levi music thiamte uk tu in kiteal hi.

^23-24 Berechiah le Elkanah sia Obed Edom le Jehiah taw Thuciamna Thingkuang cing tu in kiteal hi. Thuciamna Thingkuang mai ah lemle tum tu in thiampi ahi Shebaniah, Joshaphat, Nethanel, Amasai, Zechariah, Benaiah le Eliezer te kiteal hi.

Jerusalem ah Thuciamna Thingkuang Kikhiin

²⁵ Tuabangin David kumpipa, Israel lampuite le ngalkapmangte Thuciamna Thingkuang la tu in Obed Edom inn ah pai in thupi takin poai vawt uh hi.

²⁶ Amate in Thuciamna Thingkuang a pua Levi te in Pathian huna a nga nanak natu in khuital sali le tuu salite sangaw biakpiakna in pia uh hi.

²⁷ David le music thiamte, a lampui Chenaniah le Thuciamna Thingkuang a pua Levi te zong in puanneal phabel taw a kivawt puantualte veu silh uh hi. David zongh puanneal ephod khat silh hi.

²⁸ Tuabangin Israel te theampo in Thuciamna Thingkuang sia lungdamna taw au in lemle, sakii, daalkopsai le tengtonghte tum kawmin Jerusalem khua ah tonpui uh hi.

²⁹ Thuciamna Thingkuang sia khuapi sungah a tumpui laitak Saul ii tanu Michal in khelki pan en a, David kumpipa lungdamna taw laamin a lelen a mu ciangin mu thada huai sa hi.