Titus lạgitʼ Pạul Apostolakʼ ciṭhi 3 - সান্তালী বাইবেল

Okaṭakʼ bhạlạiyakʼkan ona kạmi lạgitʼ hukum

¹ Isorren hoṛko disạ ocokom jemon onko do mạliki ar ektiạri menakʼtako hoṛ gobolreko tahente, onkoakʼ hukumko batao ar hoṛkoakʼ sanam lekan bhage kạmi lạgitʼ sapṛao akanko tahen.

² Onko do okoeyakʼ hõ jemon aloko nindạu se aloko jhogṛakoma, bickom soṛa monanko hoyokʼte sanamko tulucʼ mạ̃hir salakʼ jemonko beohar.

³ Abo hõ pạhil do bebujko, bebataoko, bulạu ocokʼko, ạḍi lekanakʼ bạṛicʼ sana ar hạ̃s rạskạre golam akanko bon tahẽkana. Abo do dusṭạmi ar hiskạte din bon khemoetʼ tahẽkana. Ar eṭakʼko bon hirkhạwako kan tahẽkana.

⁴ Menkhan aboren babańcaoicʼ Isorakʼ daya ar dulạṛ abore sodoren khan uni do kại khone bańcaoketʼ bona.

⁵ Jãhãn bhage kạmi lạgitʼ do bae bańcao akatʼ bona, menkhan dayategeye bańcaoketʼ bona. Sonot Jiu hotete nãwã janamte ar nãwã arokʼte uni do aboakʼ ontore ạrupʼ saphakeda, ar nonkateye bańcaoketʼ bona.

⁶ Aboren babańcaoicʼ Jisu Mạsi hotete uni do sonot Jiue danatʼ bona.

⁷ Jemon jaejug jion reakʼ aste Isorakʼ sanamakʼren ạidạriko bon hoyokʼ. Noa do eken Isorakʼ dayate dhorom mentebon lekha ocoakana.

⁸ Noa do sạri katha kangea. Ińakʼ monejoṅakʼ do noage, am do noako babotre jor emakʼme, jemon Isorre okoeko biswạs akan onko do eṭakʼko bhạlạiko reakʼ kạmire lạgiạ paṛao akanko tahen. Noako do bhagegea ar hoṛko lạgitʼ porhoanakʼ kana.

⁹ Menkhan bebuj leka ṭheṭa baṛae, bõs budạ, jhogṛa-jhạṭi ar ạn-ạrikote reṭepeṭekʼ khon am do sạṅgińre tahenme, ente noakore jãhãn lab do bạnukʼa; ar noako do ạuṛiyakʼgea.

¹⁰ Okoe hoṛ bhul cecetʼatʼte dola duliye hoeocoyetʼ uni do pạhilre mitʼ dhao, ar tayomte arhõ dosar dhao sontorkaeme. Ar noate kạmi baṅ hoylen khan uni tulucʼ do gate hõ alom gatekʼa.

¹¹ Baḍaegeam, nonkan hoṛkoakʼ hudis cintạ do bạṛicʼgetakoa. Uni doe kạikại hoṛkana; ar acʼ apnartege dusi menteye sạbudokʼ kana.

Mucạtʼ katha

¹² Artemas se Tukhikus am ṭheniń kol lekinre am do Nikopoliste iń ṭhen hijukʼ lạgitʼ kurumuṭuiyme, ente Nikoposlirege rabaṅ din khemao lạgitʼ doń goṭa akawana.

¹³ Ạn guru Senas ar Apolloss do calakʼ horre goṛowạkinme, jemon jãhãn ṭonṭa alo hoyokʼ tạkin.

¹⁴ Eṭakʼko bhạlạiko reakʼ kạmire lạgiyạ paṛao akae tahen lạgitʼ aboren hoṛko cetʼako hoyokʼa, jemon onko do eṭakʼkoakʼ reṅgejokʼreko goṛo daṛeako. Arko nonka lekhan onko do jionreko jo bahakʼa.

¹⁵ Iń tulucʼ menakʼko jotoge am doko joharam kana. Mạsire biswạs iạte okoe aleko dulạṛetʼle onko do aleakʼ johar emakom. Ape sanamko tulucʼ Isorakʼ daya baṛe tahenma.