Sosolhayic̕ 7 - সান্তালী বাইবেল

Ạkil reakʼ katha

¹ Damanakʼ sunum khon bhage ńutumokʼge bogea, janam din khon gujukʼ dinge bhagea.

² Bhoj oṛakʼte calakʼ khon homor oṛakʼte calakʼge bogea, ente sanam manwage mitʼ din gujukʼ hoyokʼtakoa; ar jiwetʼko do onako moneyakʼma.

³ Rạskạkʼ khon bhabnakʼge bhagea, ente mẽtʼãhãre duk tahẽlenrehõ ontorre do suk tahẽdaṛeakʼa.

⁴ Ạkilan hoṛakʼ mon do homor oṛakʼre tahena, menkhan bebujkoakʼ mon do rạskạwakʼ oṛakʼrege.

⁵ Bebujkoakʼ sereń ańjom khon ạkilan hoṛkoakʼ egere bhagea.

⁶ Ṭukucʼ latarre jạnum sahan cetʼ leka oṭejokʼ; bebujkoakʼ landa hõ onkage. Noa hõ ạuṛiyakʼgea.

⁷ Ạkilan hoṛe julum khan uni do bebujicʼ lekae hoyokʼa, ar ghus do buje nosṭoea.

⁸ Jãhãnakʼ reakʼ etohopʼ khon mucạtʼge bhagea, ar bạḍại khon sombhurikʼge bhagea.

⁹ Amakʼ mon do alom kạhĩs ocoytama, ente kạhĩs do bebujkoakʼ koṛamre gạḍiạu akan tahena.

¹⁰ “Nahakʼ khon Sedaeakʼ dinkoge cedakʼ bhage tahẽkana?” Niạ katha do alom kuliya, ente budan hoṛkoakʼ nonka kukli do baṅ sajaokʼa.

¹¹ Ạkil do sompotti ńamakatʼ leka bhage jinis kana; jiwetʼ hoṛko lạgitʼ ona do sorosgea.

¹² Ṭaka poesa lekage ạkil doe rukhiyạgea, tobe ạkil reakʼ sorostetʼ do hoyokʼkana ạkil do ạkilan hoṛakʼ jiwiye rukhiyạitaea.

¹³ Isorakʼ kạmiko ạribạndhitae pe. Uniye konḍea akatʼakʼ do okoeye sojhe daṛekea?

¹⁴ Suk dinkore rạskạkʼme; menkhan duk dinre do niạko katha hudisokʼme, Isor cetʼleka suke dohoakatʼ onkage duk hõe dohoakada, jemon manwa do acʼakʼ tayom din reakʼ cetʼge aloe baḍae daṛeakʼ.

¹⁵ Ińakʼ noa ạuṛiyakʼ dinkoreń ńelakada, mitʼṭen dhorom hoṛ do acʼakʼ dhoromtetʼreye gujukʼ kana, ar mitʼṭen bedhorom hoṛ do acʼakʼ bạṛicʼakʼre ḍher dine bahaokʼ kana.

¹⁶ Apnarakʼ mẽtʼre ḍher do alom dhoromokʼa se ḍher ạkilan hõ alom hoyokʼa. Cedakʼ am do apnartetʼem maraokʼa?

¹⁷ Bedhoromre alom tahena, ar bebujicʼ hõ alom hoyokʼa. Okte ạurire do cedakʼem gujukʼa?

¹⁸ Niạ banar sopolhage sapʼ dohoyme, okaṭakʼ hõ alom aṛakʼ giḍikakʼa; okoe hoṛ Isore botorae uni do jãhãnakʼge ạḍi do bae bạ̃ṛtiya.

¹⁹ Gel goṭecʼ disạm cakʼlaoko nagraha tinạkʼ bako daṛe ocoy ạkil do mitʼṭen ạkilanicʼ hoṛ ona khon hõ bạ̃ṛtiye daṛe ocoyea.

²⁰ Dhạrtire nonkan dhorom hoṛge bạnukʼkoa okoe jao okte bhageakʼe kạmikan, ar tishõ bae kạiyetʼ.

²¹ Hoṛko roṛ baṛae sanam kathako do alom luturakʼa, baṅkhan, amren guti ame sarapam kanem ańjom boteja;

²² ente am do amakʼ ontorem baḍaegea, am hõ eṭakʼko ḍher dhaoem sarap akatʼkoa.

²³ Iń do niạko ińakʼ ạkilte biḍạukateń ńelkeda, ariń menkeda, “Ạkilan hoyokʼte hõń hoyokʼgea.” Menkhan ona do iń khon sạṅgińre tahẽyena.

²⁴ Jion reakʼ asol manetetʼ do khạndrigea, ona do baṅ ṭạmḍạu tiyogokʼa; ar okoe ona doe sendra ńam daṛekea?

²⁵ Ona iạte iń do mon iń murukkeda jemon ạkil ar jotowakʼ tayomre oka goṭawakʼ menakʼ onań baḍae daṛeakʼ ar biḍạu ar khoj hataokateń ńel daṛeakʼ, ariń bujhạu daṛeakʼ, bạṛicʼakʼ do bebujtetʼ kana mente ar bebujtetʼ do khepawakʼge.

²⁶ Ińiń ńelkeda, gujukʼ khon hõ uni maejiu doe haṛhatʼgea, uniyakʼ mon do mitʼṭecʼ jhampa ar jhạli leka ar uniyakʼ tikin do sikṛige. Ar okoe hoṛ Isore kusi ocoye uni do uniyakʼ ti khon apnartetʼe rukhiyạkʼa, menkhan kại hoṛ do jhạlireye paṛaokʼa.

²⁷ Sosolhayicʼe meneda, “Ńelme, jotowakʼ tayomre oka goṭawakʼ menakʼ ona ńela mente iń do dhape dhap lahakate adomakʼ bisoekoń baḍaekeda.

²⁸ Iń do ạkil reakʼ iń sendrakeda menkhan bạń ńamleda unre iń do hajar hoṛko talare sarhao lek mitʼṭen khạṭi herel hoponiń ńamkedea, menkhan onko talare khạṭi mitʼṭen maejiu hõ bạń ńamledea.

²⁹ Eken niạgeń baḍae daṛeada, Isor do manwa khạṭigeye benaoledea, menkhan manwa do aema lekan ghạṭ secʼko calaoena.”