Sosolhayic̕ 6 - সান্তালী বাইবেল

¹ Siń cando latarre armitʼṭecʼ duk iń ńelakada, ona do manwako lạgitʼ ạḍi hamalgea.

² Isor do jãhãe manwa nunạkʼ dhon, sompotti ar manote danae kana, one uni khojogokʼakʼ cetʼge baṅ tahenkan, menkhan Isor do suk bhog lạgitʼ ektiạri bae emakawadea, menkhan eṭakʼ mitʼ hoṛ do ona reakʼ suke joma. Noa do ạḍi duk reakʼ kangea, ar ạuṛiyakʼgea.

³ Jãhãe hoṛren mitʼsae hopon ar hoponerako tahentae ar ḍher din jiwetʼe tahen, menkhan jionre suk bae bhog ar lek leka topa hõ bako topaye enḍekhan jãhãtinạkʼ bochorge jiwetʼe tahen ińiń menkea ona khon bickom gocʼ hopon ar hoponerakoakʼ janamge bhagekokʼa.

⁴ Uni gocʼicʼ hopon do khamakha hecʼkate ńutrege bidại hataokea ar ńutrege uniyakʼ ńutum do dapalkokʼa.

⁵ Uni do tishõ siń cando bae ńellede se cetʼge bae baḍaeletʼre hõ uni hoṛ khon ḍher jirạue ńama.

⁶ Menkhan uni hoṛ jodi bar hajar bochor jiwetʼe tahen ar jionre suk bae bhog daṛeakʼ enḍekhan uniyakʼ do cetʼ porho? Jotoge cetʼ ona mitʼ ṭhạ̃irege bako calakʼa?

⁷ Manwawakʼ joto lekan khaṭaoakʼ do uniyakʼ lacʼ lạgitʼ kana, enhõ uniyakʼ reṅgecʼ do tishõ baṅ cabakʼtaea?

⁸ Lelha hoṛ khon ạkilan hoṛ do cetʼteye sorosa? Eṭakʼko samaṅre cetʼleka calakʼ hoyokʼ onae baḍaekate mitʼṭecʼ reṅgecʼ hoṛakʼ do cetʼ porho?

⁹ Arhõ ńam reakʼ as khon bickom mẽtʼte oka ńel ńamokʼ onare tirpit tahenge bhagea. Niạ hõ ạuṛiyakʼgea, eken hoe tayomte ńir calakʼkan chaḍa ar cetʼge baṅkana.

¹⁰ Oka menakʼ ona do laha khonge ṭhik dohoakana, ar manwa baṅe celekan ona doe baḍaegea; ar apnar khon okoeye daṛege uni sãote do bae reṭepeṭekʼa.

¹¹ Tinạkʼ bạ̃ṛti katha hoyokʼ unạkʼge ạuṛiyakʼtetʼ hõ ḍherokʼa, onate manwa do cetʼ porho hoyokʼtaea?

¹² Manwawakʼ goṭa jionre uni lạgitʼ bhageakʼ do okoeye baḍaea? Uni do acʼakʼ thoṛa ar baṅ tahẽ utạrakʼ dinko umul lekae khemaoeda. Ar uniye sen len khan siń cando latarre oka hoyokʼ ona do okoeye lại daṛekea?