Sosolhayic̕ 5 - সান্তালী বাইবেল

Isor botorae

¹ Isorakʼ oṛakʼte bolokʼ jokhecʼ sontorte taṛamme. Okoe apnarakʼ behokakʼ bae bujhạu akatʼ uni bebujicʼ leka samaṅokʼakʼ porob manao khon bickom Isorakʼ bataotaege bhagea.

² Amakʼ mocate katha do usạrate alom roṛgoda; ar Isor ṭhen hako pako jãhãnakʼ katha hõ alom roṛa. Isor do sermare menaea ar am do dhạrtire, onate amakʼ katha do jemon thoṛage hoyokʼ.

³ Ḍher bhabna cintạ tahẽlen khan hoṛko cetʼleka kukmũko ńel onkage ḍher katha roṛle khan bebujtetʼ hõ oḍok hijukʼa.

⁴ Isor ṭhen jãhãnakʼge manotakʼem dohoakatʼ khan ona purạu do alom biloma. Uni do bebuj hoṛkore rạskạ do bạnukʼtaea. Ar amakʼ manotakʼ do uni purạuaeme.

⁵ Ente manotakʼ dohokate bam purạu daṛeakʼ khan baṅ dohoge bhagea.

⁶ Amakʼ moca do kại secʼ aloe or idimema. Ar alom menma, “Ińakʼ manotakʼ dohoy do bhul hoyakana,” Noa katha do mundilren sapʼdapʼko hõ alom lạiyakoa. Amakʼ katha iạte Isor do cedakʼe edrekʼte amakʼ titeakʼ kạmi doe bạṛijtama?

⁷ Ḍher kukmu ńel ar ḍher katha roṛ do ạuṛiyakʼgea, menkhan am do Isor botoraeme.

Dhon-durib do ṭikạu baṅ tahena

⁸ Amakʼ elakaren jãhãe reṅgecʼ hoṛ santao ocokʼem ńellere se jãhãe hoṛakʼ hok reakʼ bicạr ar hok reakʼ ạidạri bae ńametʼkanem ńellere alom botorokʼa, ente mitʼ kạmiạyicʼ cetanre maraṅ ar mitʼ kạmiạyicʼ menaea ar unkin banahoṛ cetanre arhõ maraṅ kạmiạyicʼ menaea.

⁹ Enhõ cas reakʼ jumiko rukhiyại lạgitʼ mitʼṭen raje tahẽlen khan disạm lạgitʼ do bhage hoyokʼa.

¹⁰ Okoe hoṛ ṭaka poesae dulạṛetʼkan uni do ṭaka poesate tisge bae bikʼa. Okoe hoṛ dhon duribe dulạṛetʼkan uni do acʼakʼ arjaoakʼte tisge bae tirpitokʼa. Noa hõ ạuṛiyakʼgea.

¹¹ Sompotti ḍherlen khan jojom hoṛ hõko ḍherokʼa. Onaren mạlik do onako beṅgetʼakʼ chaḍa ar cetʼ lab hoyokʼtaea?

¹² Okoeye khaṭaokʼ uni do thoṛa ar ḍhere jomlere hõ mońj jạpitʼ hoyokʼtaea. Menkhan kisạ̃ṛ hoṛakʼ ḍher dhon durib do bae jạpitʼ ocoaea.

¹³ Siń cando latarre mitʼṭecʼ ạḍi bạṛicʼakʼ iń ńel akada- kisạ̃ṛ hoṛ do ḍher dhonko doho jogaogea menkhan sesre ona reakʼ do lokshan hoyokʼa.

¹⁴ Jãhãnakʼ ghoṭonare paṛaokate ona do caba utạrokʼa. Onate uniren hopon lạgitʼ do ar cetʼge baṅ tahena.

¹⁵ Eṅgatakʼ kukhi khon manwa do uluṅgeye hijukʼkana; ar oka lekae hijukʼkan onkageye calakʼa. Uni do acʼakʼ khaṭaoakʼ reakʼ cetʼge bae iditora daṛeakʼa.

¹⁶ Niạ hõ ạḍi duk reakʼ bepar kana, manwa cetʼlekae hijukʼ onkage ruạṛ calakʼ hoyokʼtaea; onate uniyakʼ lab do cetʼtae? Uni do hoe lạgitʼgeye khaṭaokʼ kana.

¹⁷ Uni do jiwetʼ jonomge ńutreye tahenkana ar edre are kạhĩsokʼ kana.

¹⁸ Ona tayomiń bujhạukeda, siń cando latarre manwa tinạkʼ din jiwetʼe dohoyede onate jom-ńũ ar kajak khaṭao talate tirpitokʼ tahenge uni lạgitʼ do bhage ar lek kana, ente uniyakʼ kuṛại do ona kangea.

¹⁹ Ona chaḍa Isor do tinre manwa dhon duribe danaea unre uni do ona jom lạgitʼgeye danae kana, uni do apnarakʼ kạmikate hesecʼ sekrecʼjokʼ lạgitʼ mitʼ hĩse emaekana. Noa jotoge Isorakʼ dan kana.

²⁰ Uni do acʼakʼ bahaokʼ din secʼ do bae beṅgeda, ente Isor do uniyakʼ monre rạskạteye perecʼ akatʼtaea.