Sosolhayic̕ 4 - সান্তালী বাইবেল

Santao, khaṭaokʼ ar eskar

¹ Siń cando latarre oka santaoko hoyokʼkan ona secʼ mitʼ dhao beṅgetʼkateń ńelkeda santao ocokʼko doko rakʼeda, menkhan onko jiwi raṛecʼ emako lạgitʼ do celege bạnukʼkoa. Sasantaoko ṭhen do ektiạri menakʼa, menkhan santao ocokʼko jiwi raṛecʼ emako lạgitʼ do celege bạnukʼkoa.

² Ińiń bujhạu daṛeada okoe ńit hạbicʼ jiwetʼ menakʼko onko khon okoe lahareko gocʼ akan onko do arhõ bhage dosare menakʼkoa.

³ Menkhan nukin bana hoṛ khon uniyakʼ obosta do arhõ bhagegea okoe ńit hõ ạuriye janamokʼ ar siń cando latarre behokakʼko ạuriye ńel.

⁴ Ińiń ńelkeda, ạḍepaseren hoṛ cetanre hiskạ iạte manwa do joto lekanakʼe khaṭaokʼ kana ar joe ńameda. Ar niạ hõ ạuṛiyakʼ kana, eken hoe tayomte ńir calakʼ chaḍa ar cetʼge baṅkana.

⁵ Bebuj hoṛ do acʼakʼ tiye lạṭumkakʼ kana ar reṅgecʼteye eken jaṅokʼ kana.

⁶ Hoe tayomte ńir calakʼ lạgitʼ khaṭaokate bar ańjle ńam khon sulukte mitʼ cuputʼ ńamge bhagea.

⁷ Siń cando latarre arhõ thoṛa bin joteakʼ iń ńelkeda.

⁸ Mitʼṭen hoṛ doe eskargea-uniren do gidrạ hõ bạnukʼkotaea; ar boeha hõ bạnukʼkotaea; enhõ uniyakʼ khaṭaokʼ reakʼ ses do bạnukʼtaea ar dhon duribte hõ mẽtʼ do baṅ tirpitokʼ kantaea. Uni doe kuliyana, “Okoe lạgitʼ iń khaṭaokʼ kana? Ar hesecʼ sekrecʼjokʼ khon do cedakʼ iń pharak akana?” Niạ do ạuṛiyakʼgea, ar haron bạḍkana.

⁹ Mitʼ hoṛ khon bar hoṛge bhagea, ente unkinakʼ kạmi do jo bahakʼa.

¹⁰ Mitʼ hoṛe bhindạṛlen khan uniren gate do uniye or beretʼ daṛeaea; menkhan hae uni hoṛ do oneye bhindạṛlenre berede lạgitʼ celege bako tahen.

¹¹ Ona chaḍa bar hoṛ mitʼrekin giticʼlen khan hoṛmo do lolokʼgea, menkhan mitʼ hoṛ do cekate lolokʼtaea.

¹² Manwa eskare tahẽlen khan algategeye bhagao ocokʼa, menkhan bar hoṛ dokin rukhiyạ daṛeakʼa. Pea baber mitʼdomte ũńle khan algate do baṅ topakʼ godokʼa.

Manot do ạuṛiyakʼgea

¹³ Mitʼṭen lelha haṛam raj, okoe do sopolha hatao bae khoj uni khon boroṅ mitʼṭen reṅgecʼ ar budan juạngeye bhagea.

¹⁴ Uni juạn do ona rajosṭi reakʼ mitʼṭecʼ reṅgecʼ gharońjreye janamlenre hõ enhõ hajot khon oḍok tayom do raje hoylena.

¹⁵ Ińiń ńelkeda, okoe jiwetʼko tahẽkan, metakʼme siń cando latarreko dãṛãbaṛae kan tahẽkan onko do lelha haṛam raj tayom okoeṭakʼ juạn do raje hoylen uniko pańjakedea.

¹⁶ Nui juạn rajren do lahate aema hoṛko tahẽkana one okoeko cetanreye rajokʼkan tahẽkan, menkhan uni tayomte darakanko do unire kusi bako tahẽkana. Noa hõ ạuṛiyakʼgea, eken hoe tayomte ńir calakʼkan chaḍa ar cetʼge baṅkana.