Sosolhayic̕ 3 - সান্তালী বাইবেল

Jotowakʼ reakʼge okte do menakʼa

¹ Jotowakʼ lạgitʼge mitʼṭecʼ okte menakʼa; serma latarre mitʼke mitʼ kạmi reakʼ mitʼṭecʼ niṭ akatʼ okte do menakʼgea-

² Janamokʼ okte ar gujukʼ okte, rohoe okte ar totʼ giḍikakʼ okte,

³ gujukʼ lạgitʼ okte ar bogekʼ lạgitʼ okte, rạputʼ giḍikakʼ lạgitʼ okte ar benao lạgitʼ okte,

⁴ rakʼjoṅ okte ar landae okte, homor halaṅ okte ar enecʼ lạgitʼ okte,

⁵ dhiri capatʼ giḍikakʼ okte ar onako halaṅ jarwae okte, dulạṛ salakʼ hạṛubokʼ okte ar hạṛupʼ khon sahaṛokʼ okte,

⁶ sendra ńam okte ar adokʼ okte, dohoy okte ar giḍikakʼ lạgitʼ okte,

⁷ oṛecʼ giḍikakʼ okte ar rog lạgitʼ okte, thir hapekokʼ okte ar roroṛ lạgitʼ okte,

⁸ dulạṛokʼ reakʼ okte ar kurudokʼ lạgitʼ okte, lạṛhại okte ar sulukokʼ lạgitʼ okte.

⁹ Okoeye kạmikan uni do cetʼ acʼakʼ khaṭaokʼakʼ reakʼ jo bae ńama?

¹⁰ Isor do manwa cetanre oka bojhae lade akatʼ ona doń ńelakada.

¹¹ Uni do sanamakʼ reakʼ okteye ṭhik dohoakada. Uni do manwa ontorre jaejug reaṅ bujhạu reakʼ mone emakawadea, menkhan manwa do pạhil khon mucạtʼ hạbicʼ cetʼe cekaea ona bae bujhạu daṛeakʼa.

¹² Ińiń baḍaea, manwa jionre rạskạ ar bhage kạmi chaḍa uni lạgitʼ bhageakʼ do ar cetʼhõ bạnukʼa.

¹³ Niạ do Isorakʼ dan kana, sanam manwageko jom ńũiya ar uniyakʼ joto kạmire kusiko tahena.

¹⁴ Ińiń baḍaea Isor jãhãnakʼgeye cekae ona do jaejug hạbicʼ tahena; cetʼge ona tulucʼ do baṅ juṭujokʼa ar cetʼge ona khon hõ baṅ badokʼa. Isor doe nonka akada jemon manwa uniko botorae.

¹⁵ Okako menakʼ ona do sedae khonge tahẽkana, ar oka hoyokʼ ona hõ sedaere tahẽkana; oka hoyen Isor do ona ar hõe hoeocoya.

¹⁶ Iń do siń cando latarre ar mitʼṭen bepariń ńelkeda, hok bicạr ar dhorom jaegare hõ bedhorom do menakʼgea.

¹⁷ Iń do mone moneteń menkeda, “Isor do dhoromicʼ ar bedhoromicʼ nukin bana hoṛgeye bicạrkinạ, ente uni ṭhen do sanamakʼ babotre ar sanamakʼ kạmire mitʼṭecʼ niṭ akan okte menakʼa.”

¹⁸ Iń do noa hõń hudiskeda, Isor do manwae biḍạu aṭkaretʼkoa jemonko bujhạu daṛeakʼ onko do janwar tulni kanako mente,

¹⁹ Ente manwakore okako hoyokʼ janwarkore hõ onakoge hoyokʼa. Janwar cetʼleka gujukʼ hoyokʼtae onkage manwa hõ gujukʼ hoyokʼtaea. Unkinakʼ sahẽtʼ do mitʼ lekangea. Niạ babotre janwar ar manwa talare cetʼ begarge bạnukʼa; ente sanamakʼ do ạuṛiyakʼgea.

²⁰ Jotoge mitʼ jaegareko calakʼa; sanamakʼge hasa khon benao akana ar hasatege ruạṛ calakʼa.

²¹ Manwa jiu do cetan secʼ ar janwar jiwi do ot latar secʼ calakʼa ona do okoeye baḍaea?

²² Onateń ńelkeda, nijakʼ kạmire rạskạkʼ chaḍa ar bhage jãhãnakʼ do manwa lạgitʼ bạnukʼa. Onage uniyakʼ kuṛại do, ente uniyakʼ gujukʼ tayom cetʼ hoyokʼtae ona do okoeye udukʼ daṛekea?