Sosolhayic̕ 2 - সান্তালী বাইবেল

Hesecʼ sekrejokʼ do ạuṛiyakʼgea

¹ Iń do apnartetʼ iń menjoṅana, “Suk do cetʼ kana, ar ona aṭkar lạgitʼ iń doń hesecʼ sekrejokʼa jemon onań biḍạu aṭkar daṛeakʼ.” Menkhan ińiń ńelkeda, ona hõ ạuṛiyakʼgea.

² Ińiń menkeda, “Landare hõ bebuj menakʼa, ar hesecʼ sekrejokʼre hõ baṅ cetʼ porho!”

³ Iń do ạkilte ạyur ocokʼ tulucʼge darkha rasa ńũkate hoṛmoń loloketʼtińạ ar bebuj leka kạmikate apnartetʼ kusikʼ reakʼ iń kurumuṭukeda. Iń do ńeńel iń menana, serma latarre manwawakʼ thoṛa din reakʼ jionre uni lạgitʼ bhageakʼ do okaṭakʼ kana- ạkil horte senokʼ se bebuj horte calakʼ.

⁴ Iń do napṛakʼ napṛakʼ kạmikoń kạmikeda. Iń do apnar lạgitʼ aema oṛakʼ koń benaoana ar aema darkha bagwankoń tearkeda.

⁵ Iń do huḍiń ar maraṅ aema bagwankoń tearkeda ar onare joto lekan jowanakʼ darekoń rohoekeda.

⁶ Iń do apnar lạgitʼ pukhrikoń la ocokeda jemon bagwan reakʼ darekore dakʼ iń em daṛeakʼ.

⁷ Iń do ạḍi utạr guti ar kạ̃ṛmĩkoń kirińketʼkoa, ar aema guti kạ̃ṛmĩko do ińakʼ oṛakʼreko janamena. Iń lahate Jerusalemre okoeko tahẽkan onko khon ińren do ạḍi utạr ḍaṅgra ar bhiḍiko tahẽkana.

⁸ Iń do ạḍi utạr sona-rupạ ar judạ judạ rapajkoakʼ ar eṭakʼ eṭakʼ disạm reakʼ dhonko ạgukate apnar lạgitʼ iń jogao dohoan tahẽkana. Iń do ạḍi utạr sekʼreńko ar herel rạskạ ocoko lạgitʼ chuṭki erakoń ńamketʼkoa.

⁹ Iń lahate Jerusalemre okoeko tahẽkan onko khon hõ iń do ḍher dhoniń hameṭana. Ar akel do unhõ ińe ạyuredeń tahẽkana.

¹⁰ Ińakʼ mẽtʼre oka bhageakʼ iń hudisetʼ tahẽkan onageń kạmiyetʼ tahẽkana; ar joto lekan rạskạwakʼregeń seletʼ mitʼlena. Jotowakʼ kạmirege mon do kusikʼkan tahẽkana, ar niạge ińakʼ sanam khaṭaoakʼ reakʼ kuṛại tahẽkana.

¹¹ Enhõ okakoń ceka akatʼ ar oka ńam lạgitʼ iń khaṭaolen ona secʼ tinreń ạribạndhikeda unreń ńelkeda jotowakʼge ạuṛiyakʼ kana. Noako sanamakʼ do eken hoe tayomte ńir calakʼkan chaḍa ar cetʼge baṅkana. Siń cando latarre okaṭakʼge porhowanakʼ do baṅkana.

¹² Ona tayom iń do ạkil, khepa ar bebuj reakʼ kathań cintạkeda. Lahaten rapajko cetʼlekako kạmikan tahẽkan ona do cetʼ bon baḍae daṛekea, tayomren raj do onka lekae kạmi idiya mente?

¹³ Ińiń ńelkeda, ńut khon marsal cetʼleka sorosge, onkage bebuj khon ạkil hõ sorosgea.

¹⁴ Ạkilan hoṛakʼ do mẽtʼ menakʼtaea, menkhan bebuj hoṛ do ńutreye dãṛãnkana; menkhan iń do niạgeń bujhạu daṛeada, unkin bana hoṛakʼ mucạtʼ dosa do mitʼgea.

¹⁵ Ona tayom iń do apnarakʼ monreń menkeda, “Bebuj hoṛ oka dosa hoyokʼtae ińakʼ hõ inạ dosage hoyokʼtińạ. Enḍekhan unạkʼ ạkilan hoṛ hoykate ińakʼ do cetʼ lab hoyena? Noa hõ ạuṛiyakʼgea.”

¹⁶ Cetʼleka hoṛko do bebuj hoṛko bako disạ dohoko onkage ạkilan hoṛ hõ ḍher din do bako disạ dohokoa; tayom daram dinkore nukin bana hoṛgeko hiṛińkinạ. Bebuj hoṛ cetʼlekae gujukʼ onkage ạkilan hoṛ hõe gujukʼa.

¹⁷ Onate iń do ińakʼ jioniń ạṛisada, ente siń cando latarre oka kạmikʼ kan iń ṭhen ona do kosṭo reaṅ hoyena- ar jotoge ạuṛiyakʼgea, hoe tayomte ńir calakʼkan chaḍa ar cetʼge baṅkana.

¹⁸ Siń cando latarre okako jinis lạgitʼ iń khaṭao akan onako ńitokʼ doń kurudakʼ kana, ente iń tayomte okoeye hijukʼ uni lạgitʼge jotowakʼ do doho oṭokakʼ hoyokʼtińạ.

¹⁹ Uni hoṛ do ạkilan se lelhayicʼe hoyokʼa ona do okoeye baḍaea? Enhõ uni do ińakʼ khaṭaoakʼ reakʼ mạlike hoyokʼa, oka do siń cando latarreń khaṭaolen ariń hameṭakatʼ. Noa hõ ạuṛiyakʼgea.

²⁰ Onate siń cando latarre okań khaṭaolen onate ińakʼ ontor do as chuṭạu entińạ.

²¹ Niạ reakʼ karon do hoyokʼkana bud, ạkil ar lekman iạte mitʼ hoṛ doe khaṭao daṛeakʼa, menkhan ona tayom uniyakʼ jotowakʼ do ạidạri lekate nonkan mitʼ hoṛ lạgitʼ doho oṭokakʼ hoyokʼtaea okoe do ona lạgitʼ jãhãnakʼ cetʼge bae khaṭao akan. Noa hõ ạuṛiyakʼgea ar ạḍi kosṭo reakʼ kangea.

²² Siń cando latarre manwa okae khaṭaokʼkan are cintạ bhabnakʼkan ona kuṛại reakʼ uniyakʼ do cetʼ porho hoyokʼtaea?

²³ Dinạm hilokʼ uniyakʼ kạmire duk ar bhabna do tahẽnkangea; ar ńindạ hõ uniyakʼ mon do baṅ jirạukʼkana. Noa hõ ạuṛiyakʼ kana.

²⁴ Enḍekhan manwa lạgitʼ jom-ńũ ar apnarakʼ kạmire rạskạjoṅ chaḍa bhage ar cetʼge bạnukʼa. Ińiń ńelkeda niạ sanamakʼ do Isor ṭhen khonge hijukʼ kana,

²⁵ Ente uni bae emlen khan okoeye jom daṛekea seye rạskạ daṛekokʼa?

²⁶ Okoe Isore kusi ocoye uni do bud, ạkil ar rạskại danaea, menkhan kại hoṛ do dhon-durib jogaṛ lạgitʼ ar ona jogao reakʼ kạmiye emaea, jemon ona do uni hoṛe emawae one okoe do Isore kusi ocoyedekan. Noa hõ ạuṛiyakʼgea, hoe tayomte ńir calakʼkan chaḍa ar cetʼge baṅkana.