Sosolhayic̕ 12 - সান্তালী বাইবেল

¹ Amakʼ juạn oktere amren sisirjạuicʼ hõ disạyem, ente amakʼ haṛam umer reakʼ dinko hijukʼ kana, metakʼme, duk reakʼ dinko hijukʼ kana, one unrem men, “Niạ haṛam umerre onako do bạń hạ̃sakʼ kana.”

² Unre siń cando, ar marsal, ńindạ cando ar ipilkoko ńutokʼa, ar jạṛi dakʼko tayom rimil do arhõ ruạṛ hijukʼa.

Haṛam umerre hoṛmo reakʼ dosa

³ Unre oṛakʼ horhokin dokin thar tharaokʼa, ar daṛean hoṛ dokin kubjạkʼa; guhum riritʼko doko thoṛakʼa. Ar khiṛki duạr khon oyoṅetʼkan kin dokin ạndhuạkʼa.

⁴ Unre kulhi secʼakʼ kapaṭ duạr dokin sińokʼa; onate jante reakʼ saḍe do ar baṅ ańjomokʼa, cẽṛẽkoakʼ ceroberote haṛam hoṛko ebhenokʼa, ar sereń kuṛiko doko khay khoyokʼa.

⁵ Unre usul jaegate ar horte calakʼ doe botorokʼa. Ar badam dare do bahakʼa, sosrocʼ do hoḍgor hoḍgore taṛama hichạ baha do mosodokʼa. Ona tayom manwa do jaejug reakʼ oṛakʼteye calakʼa, ar hokʼmorko do kulhireko dãṛãbaṛaea.

⁶ Rupạ reakʼ sikṛi ạuri topagokʼre, se sona reakʼ bhajan ạuri rạpudokʼre, ḍạḍi ṭhen kanḍa ạuri posakʼ gejerokʼre, se kuńre cak ạuri kuṭrạ ńurokʼre, amren sisirjạuicʼ baṛe disạyeme.

⁷ Hasa do hasarege ruạṛ calakʼa. Isor okoe jiue emakade uni jiu do acʼ ṭhengeye ruạṛ calakʼa.

⁸ Sosolhayicʼe meneda, “Ạuṛiyakʼgea, ạuṛiyakʼgea, jotoge ạuṛiyakʼgea!”

Ses katha

⁹ Sosolhayicʼ do ạkilan hoṛe tahẽkana ar hoṛko hõ bidiyại cetʼ idiwatʼkoa. Uni do hudis ar biḍạu aṭkarkate ạḍi utạr kạhtukkoe gathao galaṅkeda.

¹⁰ Uni do jut jut kathakoe ńamtotʼ akada, ar uni okaṭakʼe olakatʼ ona do khạṭi ar sạri kangea.

¹¹ Ạkilan hoṛkoakʼ katha do gupikoakʼ ṭheṅga leka. Onkoakʼ kathako do kuṭạm jalatʼ akatʼ jạlạiko lekana. Ona do mitʼṭen gupiyicʼe roṛakatʼ leka.

¹² E beṭa, men cehaokʼme, puthiko olokʼ reakʼ ses do bạnukʼa ar ḍher paṛhaokʼte do hoṛmo laṅgakʼa.

¹³ Kathako reakʼ mucạtʼ do nokʼõe; tobe ses katha do hoyokʼkana, Isor botoraeme ar uniyakʼ hukumko dohoyme; ente noa kangea manwakoakʼ dạyik do.

¹⁴ Isor do mitʼke mitʼ kạmi reakʼ, se mitʼke mitʼ okoakʼko hõe bikʼcạra-baṅ do bạṛicʼakʼ kan ar baṅ do bhageakʼ kan.