Sosolhayic̕ 11 - সান্তালী বাইবেল

Budan hoṛ okako cekae

¹ Amakʼ jomakʼ do dakʼ cetanre chiṭiạume, ente ḍher din tayom ona do arhõm ńam ruạṛa.

² Eae goṭecʼ, hẽ irạl goṭecʼ hõ bakhrawakome, ente dhạrtire cetʼ muhin hijukʼa ona do do bam baḍaea.

³ Rimil do dakʼte perecʼge tahen khan ona do dhạrtire dakʼe dul ruạṛa. Dare do utạr ar dạkhin jãhãsecʼge bhinḍạṛokʼ, ona do inạ ṭhạ̃irege tahenkana.

⁴ Okoeṭakʼ hoṛ do ṭhik hoe lạgitʼe tạṅgiyetʼkan uni do itạ bae era; ar rimilko ạribạndhiyetʼkan hoṛ do phosol bae ira.

⁵ Eṅgatakʼ kukhire menae gidrạre jiuakʼ bolokʼ cetʼleka bam baḍaekan, onkage sanamakʼren sisirjạuicʼ Isorakʼ kạmi hõ bam bujhạu daṛeakʼa.

⁶ Am do setakʼ jokhecʼ itạ er me, ar ạyupʼ jokhecʼ hõ amakʼ ti doe onkaema, ente oka okte reakʼ kạmi jo bahakʼa se banarge soman hoyokʼa, ona do bam baḍaea.

⁷ Marsal do mońjgea, ar siń cando ńele hõ mẽtʼ lạgitʼ bogegea.

⁸ Jãhãe manwa ḍher din jiwetʼe tahen khan uni do onako dinreye rạskạ joṅma. Menkhan ńut reakʼ kathako hõ jemone disạima, ente onako do ḍhergea. Ar darakanakʼ jotoge ạuṛiyakʼgea.

Juạnko lạgitʼ sopolha

⁹ E juạn, amakʼ juạn oktere hulạsokʼme, juạn umer reakʼ dinkore amakʼ ontor do ame rạskạ ocomema. Amakʼ monejoṅ leka horte taṛamme ar amakʼ mẽtʼre oka bhageakʼkan ona kạmime, menkhan baḍae dohokakʼme, niạko lạgitʼ Isor do ame bicạrmea.

¹⁰ Amakʼ mon khon bhabna do sahaṛkakʼme, ar amakʼ hoṛmo do alom kosṭo ocowakʼa, ente juạn okte ar koṛa pạṛiạ do ạuṛiyakʼgea.