Sosolhayic̕ 10 - সান্তালী বাইবেল

¹ Gocʼ rõ do cetʼleka so sunum seageye so ocoy, onkage thoṛa bebujtetʼ do ạkil ar manote muchạu giḍiya.

² Ạkilankoakʼ mon do bhage hor secʼ ruạṛa, menkhan bebujkoakʼ ontor do bhul horte calakʼa.

³ Horte calakʼ jokhecʼ hõ ńelogokʼa, bebujicʼ do bud khaṭogetaea; ar uniyakʼ bebujtetʼ do joto hoṛko bujhạu daṛeakʼa.

⁴ Disạm cakʼlaoyicʼ am cetanreye edrelenre amakʼ ṭhạ̃i do alom bạgiyakʼa; ente sobori do sanam bạṛicʼakʼkoe thir ocoya.

⁵ Siń cando latarre mitʼṭecʼ bạṛicʼakʼ iń ńelkeda okaṭakʼ do ṭhikakʼ baṅkan: Disạm cakʼlaoko do nonkageko bhula-

⁶ Bebujko do cetan hudạreko doho ocokʼa, ar kisạ̃ṛko do latar hudạreko duṛupʼ ocokʼa.

⁷ Iń do golamko sadom cetanre ar cetan hudạren hoṛko do golam leka taṛamate calakʼ iń ńel akatʼkoa.

⁸ Okoe ghaḍlakʼe lae uni do onaregeye khańjokʼa; ar okoe bhite dasao uni do bińe ger botejea.

⁹ Okoe dhiriye rakab uni do onategeye hạnokʼa; ar okoe sahane paṛag uni do ona hotetege muhinreye paṛaokʼa.

¹⁰ Ṭeṅgocʼ bhotṛoge khan ar baṅ laser khan onare daṛe do ḍherge lagaokʼa, menkhan ạkil do kạmi leṭecʼ lạgitʼgeye goṛowama.

¹¹ Ạuri bandhonere bińe gerle khan babandhonicʼ do acʼakʼ gun reakʼ jãhãn porhoge bạnukʼtaea.

¹² Ạkilan hoṛakʼ moca kathare do daya menakʼa, menkhan bebujicʼ do acʼakʼ moca kathateye marao ocokʼa.

¹³ Uniyakʼ katha reakʼ etohopʼrege bebujtetʼ tahenkana, ar mucạtʼre do purạte lelhatetʼ tahenkana.

¹⁴ Bebujko do ḍher kathako roṛa, menkhan cetʼ darae kana ona do celege bako baḍaea, ar tayomte cetʼ hoyokʼa ona do manwa okoeye lạiyaea?

¹⁵ Bebujicʼakʼ khaṭaokʼ do uniye laṅga cabayea; uni do nunạkʼe lelhagea, nagrahate calakʼ reakʼ hor hõ bae baḍaekana.

¹⁶ Hae, ona disạm do! Okare kạ̃ṛmĩren bacṛa hopon do raj hudại ńam ar onḍenko mukhiyạko do setakʼ hạbicʼ bhojko jom.

¹⁷ Bhạgangea ona disạm do, one onaren raj doe bhodro hoṛren hoponkan, ar onḍenko mukhiyạko do ńũ bulokʼ lạgitʼ do baṅ menkhan daṛekʼ lạgitʼ oktereko jom ńũiyetʼ kan.

¹⁸ Asketokʼ hoṛkoakʼ sạṛim do lạndubokʼa; ar ḍhilạu iạte oṛakʼre dakʼ jorokʼa.

¹⁹ Bhoj daka do rạskạ ocome lạgitʼ; darkha rasa do jiwi hulạs ocoy lạgitʼ; ar ṭaka-poesa do sanamakʼe jogaoa.

²⁰ Raj do mon monte hõ alom sarapaea se apnar giticʼ oṛakʼre kisạ̃ṛ hoṛ hõ alom sarapaea, ente coṭren cẽṛẽ do amakʼ kathako idiya; ar udạu senkate amakʼ kathakoe lại boteja.