Soros sereń 8 - সান্তালী বাইবেল

¹ Ohae, ińren boeha baṛem tahẽlen khan okoe do eṅgạńakʼ toakine nunu akatʼ! Ar bahrereń ńamlem khan enḍekhan am doń cokʼkema, ar okoehõ cetʼge bako mendaṛekińạ;

² ar iń do horiń udukʼamkea ińren eṅgạńakʼ oṛakʼteń ạgukema, ar am dom cetʼạńkea. Iń do jut so mosola mesalakatʼ darkha rasań ńũ ocokema, ar ińakʼ ḍạlim jo reakʼ ros hõń ńũ ocokema.

³ Uni do leṅga tite bohokʼe ãṭhṛẽketʼtińạ, ar jojom tite doe hạṛupʼkedińạ.

⁴ E Jerusalemren kuṛiko, nehõrkateń metape kana, dulạṛ do alope buskuyea ar alope ebhenea uniyakʼ okteko ạuri hoyokʼtae hạbicʼ.

Gate kuṛikoakʼ katha: (Kuṛi)

⁵ Acʼren dulạṛiạreye ṭenḍar akan uni hahaṅkar secʼ khon rakapʼ hijukʼicʼ doe okoekana? Apel dare latarreń ebhenketʼmea; amren eṅgam do onḍege bedon rakapʼadete ame janamketʼmea.

Dulạṛiạwakʼ katha: (Kuṛi)

⁶ Amakʼ ontorte dohoyińme mohorchap akatʼleka ar amakʼ soporege mohor chapakʼme; ente dulạṛ do moron leka daṛeanakʼ kana, ar kobor leka kumãyãwakʼ kana ahkaokʼ do. Ona do lepʼ seṅgel leka jolokʼtege tahena, ạḍi tạpis lepʼ lekage ona do.

⁷ Aema dakʼ hõ bae ĩṛĩcʼ daṛeakʼa dulạṛ do; ar banbạsi hõ ohoe ḍubạ daṛelea ona do. Dulạṛ lạgitʼ jãhãe acʼakʼ jotowakʼe emlenre hõ ona do nihạ̃t giḍikakʼge hoyokʼa.

Kuṛiren baretkoakʼ katha:

⁸ Aleren mitʼṭen huḍiń misera menaetalea, uniyakʼ bạskin do ńit hõ ạuri harakʼtaea. Unire tisokʼ peṛako lagaokʼa enhilokʼ do cetʼle cekaea?

⁹ Uni do pạcriye tahẽlen khan uni cetante rupạ reakʼ pahra oṛakʼle benaokea. Ar duạre tahẽlen khan enḍekhan debdạru kaṭ reakʼ toktate uni do sińkatele dohokea.

Dulạṛiạwakʼ katha: (Kuṛi)

¹⁰ Iń do mitʼṭecʼ pạcri kạnạń, ar ińakʼ bạskin do usul pahra oṛakʼkin lekage. Iń do uniyakʼ nońjorre onkageń hoyena suluke ńamketʼ kuṛi lekage.

Dulạṛiạwakʼ katha: (Koṛa)

¹¹ Bakʼal-hamonre Solomonakʼ do mitʼṭecʼ darkha bagwan menakʼa; ona do horhokoe jimạ akatʼkoa. Ar ona jo reakʼ dam lekate mimitʼ hoṛ do gelbar keji rupạ sekelko emokʼa.

¹² Ińakʼ darkha bagwan menakʼa, ona do ińakʼkangea. E Solomon, ona gelbar keji rupạ do amakʼge tahenma, menkhan bar keji tala do onko lạgitʼge okoe do joko horho kan.

¹³ E bagwanre tahenkạnicʼ, gateko do amakʼ aṛaṅ ańjom lạgitʼko akʼtenkana, ar ińhõ baṛe ańjom ocoyińme.

Dulạṛiạwakʼ katha: (Kuṛi)

¹⁴ E dulạṛiạtiń, dela hijukʼme; jut so mosolate perecʼ buru coṭre selepʼ jel leka, juạn jhaṅkaṛ jel leka baṛe hoyokʼme.