Soros sereń 7 - সান্তালী বাইবেল

¹ Heṛan mońjgea panahe horokʼ akatʼ amakʼ jaṅgakin reakʼ goṛhon do! Amakʼ kaera opatʼ bulukin reakʼ abhran do mạnik leka ona do gạkhuṛ kạrigolakʼ tite kạmiyakʼge.

² Amakʼ bukạ do gulạnḍ bạṭi leka onare bheńjao akatʼ darkha rasa do baṅ ṭonṭakʼa. Amakʼ lacʼ do puńji akatʼ guhum leka ona do sikiyạm bahakote esetʼ ạcur akana.

³ Amakʼ bạskin do jel hoponkin leka poṭretʼ jelren jawa hoponkin lekage.

⁴ Amakʼ hoṭokʼ do hạti sonḍa reakʼ buruńj lekana, ar amakʼ mẽtʼkin do Hesbon reakʼ pukhri leka ona do Beth-rabbim reakʼ phaṭok duạr ṭhenakʼge. Amakʼ mũ do Lebanon reakʼ buruńj lekana, one ona do Damesek secʼ sen akan.

⁵ Bohokʼ tam do Karmel buru leka sajakana; amakʼ bohokʼ reakʼ dalae dalae upʼ do beguni roṅ lekage; ar raj do ona lacha upʼteye bondi akana.

⁶ E dulạṛiạtiń, E hạ̃sanicʼ, am do ạḍitetʼgem mońjgea, ar ạḍitetʼgem cemkecʼgea!

⁷ Amakʼ goṛhon do khijur dare leka, ar amakʼ bạskin do darkha nạ̃ṛĩ jo reakʼ thoka leka.

⁸ Ińiń menkeda, “Iń do khijur darereń dejokʼa, ar ona reakʼ jokoń saba.” Amakʼ bạskin do darkha jo reakʼ thoka leka hoyokʼma, ar amakʼ sahẽtʼ reakʼ bas do ḍabha reakʼ lekage.

⁹ Amakʼ cokʼ do mońj darkha rasa lekage baṛe hoyokʼma. Ona darkha rasa do dulạṛiạtińakʼ nạnḍrite pheḍokʼma cetʼleka jạpitʼ akatʼicʼakʼ luṭi ar ḍaṭako secʼte joro pheḍokʼkan.

Dulạṛiạwakʼ katha: (Kuṛi)

¹⁰ Iń do ińren dulạṛiạren kạnạń ar ińrege uniyakʼ gagoj do menakʼtaea.

¹¹ E dulạṛiạtiń, dela, alaṅ do ṭạnḍire laṅ oḍok calakʼa. Ar ato bahre ar mehendi jhupuṭoṛokore laṅ giticʼ aṅgakʼa.

¹² Dela, ạḍire laṅ beredokʼa ar darkha bagwante laṅ bolokʼa, onḍe darkha nạ̃ṛĩ bhoṭogokʼ kana se baṅa, onare baha do saṛ akana se baṅa, ar ḍạlim bahako baha akana se baṅa ona laṅ ńela; ar iń do onḍege ińakʼ dulạṛiń emama.

¹³ Dudại bahako do mahkaokʼ kana; alaṅakʼ duạr ṭhen do sorosakʼ nãwã ar mare joko hõ menakʼa. E dulạṛiạtiń, iń do am lạgitʼgeń doho jogao akada.