Soros sereń 6 - সান্তালী বাইবেল

¹ Maejiuko modren E napae utạricʼ, dulạṛiạtam do okateye senakana? Uni do oka secʼe ạcur sen akana? Ma lạiyaleme, ale hõ jemonle sendra goṛowam.

Dulạṛiạwakʼ katha: (Kuṛi)

² Dulạṛiạtiń do acʼakʼ bagwanteye sen akana, jut so mosola reakʼ bawgantege; bagwanre acʼren khạṛko ạtińko lạgitʼ ar sikiyạm baha sitʼ jarwae lạgitʼge.

³ Iń do dulạṛiạtińren ar uni hõ ińrenge, uni do sikiyạm baha bagwan talareye gukʼpikana.

Dulạṛiạwakʼ katha: (Koṛa)

⁴ E dulạṛiạtiń, am do Tirsa nagraha lekam mońjgea, Jerusalem lekam ṭhosokgea; nisạnkoante phạdko leka ṭhonokanicʼge.

⁵ Amakʼ mẽtʼkin do iń khon sahaṛtam; ente ona dokin khadbadao ocoyedeń kana Amakʼ upʼ do Gilead buru khon pheḍ hijukʼkan merom palko lekage.

⁶ Amakʼ ḍaṭako do kạpci akatʼko bhiḍi palrenko leka; one onko ạrupʼko khonko rakapʼ hijukʼkan. Onko mimitʼkoren do joṛa menakʼkoa, ar okoeṭakʼge bako atʼ akana.

⁷ Amakʼ ṭuṭuri kicricʼ danaṅre amakʼ joha do dạlim jo kecakʼ leka.

⁸ Turuigel rạni ar irạl gel chuṭki erako ar alekha kuṛikoko tahẽdaṛeakʼa,

⁹ menkhan potamtiń, nichorayicʼtin leka do okoege bạnukʼkoa. Uni do eṅgattetʼren sadhericʼge, one lacʼreye doholede acʼren dulạṛ hoponera. Juạn kuṛiko do uni ńelkate bhạganko metadea rạni ar chuṭki erako hõ uniko sarhaokedea.

¹⁰ Onkoko menkeda, “Okoe kanae uni do, one aṅga marsalokʼ leka pĩṛĩtʼ pĩṛĩtʼe rakapʼ hijukʼkan, ńindạ cando leka mońj, ar siń cando leka jhak jhak, nisạnkoante phạdko leka ṭhonokicʼge?”

Dulạṛiạwakʼ katha: (Kuṛi)

¹¹ Buru lodamre sarhekʼkan nãwã itạko ńel lạgitʼ, darkha nạ̃ṛĩkore baha bhoṭogokʼ kana se baṅa ona ńel lạgitʼ ḍạlim darekore baha mõhẽkʼ kana se baṅa ona ńel lạgitʼ iń do badam dare bagwanteń pheḍ senlena.

¹² Ar jãhãnakʼ ạuriń bujhạurege ińakʼ jiwi do ińren rajakʼ rãt gạḍiko reakʼ mitʼṭecʼreye duṛupʼkedińa.

Gate kuṛikoakʼ katha:

¹³ Ruạṛme, dela ruạṛme, E Sulemit; ale do jemon amle ńelme ona iạte ruạṛme, dela ruạṛ hijukʼme. Ape do Mohenoyimakʼ enecʼ ńel leka, cedakʼ Sulemit ńele dope khojkana?