Soros sereń 5 - সান্তালী বাইবেল

¹ E dulạṛiạ, E bạhutiń, iń do ińakʼ bagwanreń bolo akana; ińakʼ gondhoros iń sitʼetʼkana ińakʼ mahkaokʼ salakʼ. Iń do chatań jometʼtińạ ińakʼ dumur rasa tulucʼ, ar ińakʼ darkha rasań ńũiyetʼtińạ toa tulucʼ. Jompe, E gateko ar ńũ joṅpe, dulạṛte ńũ bikʼpe E dulạṛiạko. Dulạṛiạwakʼ katha: (Kuṛi)

Gate kuṛikoakʼ katha:

² Iń doń jạpitʼleda, menkhan ontor do jagwarge tahẽkantińạ. Ote ańjompe, ińren dulạṛiạ do silpińe ṭhopʼ ṭhopʼeda, “E dulạṛo, E dulạṛiạtiń, E potam juri tiń, E nichorayicʼ tiń, duạr jhicʼạńme baṛe. Ente sisir dakʼte ar ńindạ reakʼ kuṛhạte ińakʼ bohokʼ upʼ do lohodokʼ kantińạ.”

Dulạṛiạwakʼ katha: (Koṛa) Dulạṛiạwakʼ katha: (Kuṛi)

³ Iń do mone moneteń menkeda, “Kicricʼ iń bhạnduṛ akatʼtińạ, ar cekate ona doń horokʼ ruạṛa? Iń do jaṅgań ạbuk sapha akana, cekate ona doń mạilạitińạ?”

⁴ Dulạṛiạtiń do huṛkạṛ bhugạkʼre tiye aderkeda, ar uni lạgitʼ ińakʼ mon do bhak bhakaoentińạ.

⁵ Iń do dulạṛiạtiń duạr jhicʼae lạgitʼ iń beretʼena, unre ińakʼ ti do gondhoroste ojokʼ tahẽkana, ar kạṭupʼko khon gondhoros hõ jorokʼkan tahẽkante huṛkạṛ reakʼ ḍạnḍi do lohotʼena.

⁶ Dulạṛiạtiń lạgitʼ iń do duạriń jhicʼkeda, menkhan uni doe gusạu senena. Uni do tinre kathae roroṛkan tahẽkana unre ińakʼ jiwi do oṭaṅ lentińạ. Iń doń sendra baṛakedea, menkhan bạń ńamledea; hohowạdiyạń, menkhan bae goṅledeńa.

⁷ Nagraharen dãṛãnkan pahradarko do pahrae jokhecʼko ńamkedińa; onko do ińko dal ghạlkedińa; ar pạcrikoren pahradarko do oyon aṅgropko recʼkedińa.

⁸ E Jerusalemren kuṛiko, kiriạwạńpe, ińren dulạṛiạtińpe ńamle khan lạiyaepe iń do dulạṛteń kạhil caba akana.

Gate kuṛikoakʼ katha:(Kuṛi)

⁹ E maejiukoren mońj utạricʼ, amren dulạṛiạ do eṭakʼko khon oka secʼteye sorosa? Ar eṭakʼ dulạṛiạko khon oka oka secʼteye bhagegete, am do nonkam kiriạ ocoyetʼlea?

Dulạṛiạwakʼ katha: (Kuṛi)

¹⁰ Ińren dulạṛiạ doe eselgea, uniyakʼ hoṛmo reakʼ roṅ do arakʼgetaea; gel hajarko mod khon hõe sorosgea.

¹¹ Uniyakʼ bohokʼ do nirạ sona leka, uniyakʼ lacha upʼ do piṭi piṭi ar bhonḍa kạhũ leka ńõṛõm ńõṛõm:

¹² uniyakʼ mẽtʼ do ạtukʼkan soḍokʼ aṛere potamkin leka, Toate ạrupʼ akan, perecʼ soḍokʼ dakʼ aṛerekin apʼ akana.

¹³ Uniyakʼ johakin do jut so mosola reakʼ baṛge leka, one onḍe khon jut so mahkao oḍokokʼ kan. Uniyakʼ luṭikin do gondhoros joro pheḍokʼkan sikiyạm baha leka.

¹⁴ Uniyakʼ sopo do gulạnḍ sona leka mạnik dhiriko bạisạuakʼge. Hoṛmo do hạti sonḍa reakʼ kundạuakʼ leka, nilkanto mạnik dhirikote bạisạu esetʼakʼge.

¹⁵ Uniyakʼ bulukin do mormor khunṭi leka nirạ sona reakʼ ganḍore doṛomakʼge. Uniyakʼ rup do Lebanon reakʼ usul buru leka, debdạru dare leka sorosakʼge.

¹⁶ Uniyakʼ galmarao do heṛemgetaea, uni do joto secʼte ạḍi hạ̃sạnicʼge. E Jerusalemren kuṛiko, ińren dulạṛiạtiń ar ińren gate doe nonkanicʼ kangea.