Soros sereń 4 - সান্তালী বাইবেল

¹ E dulạṛiạtiń, am dom mońjgea! Hẽ, am do ạḍitetʼgem mońjgea. Ṭuṭuri danaṅre potam mẽtʼkin leka amakʼ mẽtʼkin do, ar amakʼ upʼ do Gilead buru khonko pheḍ hijukʼkan merom pal lekage.

² Amakʼ ḍaṭako do kạpci akatʼko bhiḍi palrenko leka one onko do ạrupʼko khonko rakapʼ hijukʼkan. Onko mimitʼkoren do joṛa menakʼkoa, ar okoeṭakʼge bako atʼ akana!

³ Amakʼ luṭikin do jeṅgetʼ arakʼ phitạ leka; ar mẽtʼãhã do ạḍi napaegetama! Ṭuṭuri danaṅre ḍạlim jo kecakʼ leka amakʼ joha do.

⁴ Amakʼ hoṭokʼ do Dạudakʼ buruńj leka; onare do mitʼ hajar ḍhalko aka menakʼa, ona do jotoge birbão hoṛkoakʼ ḍhal kana.

⁵ Amakʼ bạskin do sikiyạm bagwanre ạtińkan poṭretʼ jelren jawa hoponkin leka.

⁶ Tin hạbicʼ baṅ aṅga marsalokʼ ar ńut ạuri cabakʼ unhạbicʼ iń do gondhoros burure, hẽ, kunduru reakʼ burureń tahena.

⁷ E dulạṛiạtiń, ạḍige napaegea amakʼ hoṛmo do, amre jãhãn khutge bạnukʼa.

⁸ E bạhutiń, dela iń sãote Lebanon khon hijukʼme, Lebanon khon iń tulucʼge dela hijukʼme. Amana reakʼ cuṛạ khon, Senir ar Hermon buru reakʼ muthni khon, dhạcri kulkoakʼ dander khon, poṭea tạrupʼkoakʼ buru khon dela pheḍ hijukʼme.

⁹ E dulạṛiạtiń, E bạhutiń, amakʼ beṅgetʼte iń dom mạluṅ kedińạ; ar amakʼ hoṭokʼ reakʼ mitʼ goṭecʼ sikṛi malate ińakʼ mon dom tolketʼtińạ.

¹⁰ E dulạṛiạtiń, E bạhutiń, amakʼ dulạṛ doe rạskạ ocoyedeń kana! Ente darkha rasa khon, sanam jut mosolako khon ar amem ojokʼ akatʼ sunum reakʼ bas khon hõ amakʼ dulạr do artetʼge sorosgea!

¹¹ E bạhutiń, amakʼ luṭikin khon do nirạ dumur rasage jorokʼ kana. Amakʼ alaṅre do toa ar dumur rasage menakʼa; amakʼ kicricʼko reakʼ bas do Lebanon bir reakʼ mohok leka.

¹² E dulạṛiạtiń, E bạhutiń, am do pạcri esetʼ akatʼ mitʼṭecʼ bagwan leka; ar bond akatʼ jharna ar kũń ḍạḍi kanam.

¹³ Am do mońj ḍạlim bagwan leka; one onḍe soros soros joko jo akan; onḍe do mehndi ar jut so nạ̃ṛĩkoge menakʼa.

¹⁴ Onḍe do jaṭamạnsi, sasaṅ, boc, darcini ar sanam lekan kunduru darekoge menakʼa; onḍe do gondhoros, oguru ar joto lekan jut so dare nạ̃ṛĩkoge menakʼa.

¹⁵ Am do bagwanko reakʼ jharna kanam, bhumbuk oḍokokʼ kan kũń dakʼ leka, Lebanon khon ạtu oḍokokʼ gaḍa hõ kanam.

Dulạṛiạwakʼ katha: (Kuṛi)

¹⁶ Ebhenokʼme E utạr hoe ar dela hijukʼme E dạkhin reakʼ hoe. Aben do ińakʼ bagwan cetante hoe ben jemon ona reakʼ so do mahkao oḍokokʼ. Ińren dulạṛiạ do acʼakʼ bagwanre hecʼkate ona reakʼ bhage bhage jo ko baṛeye jomma.