Soros sereń 3 - সান্তালী বাইবেল

¹ Ńindạ jokhecʼ ińakʼ aṭetʼre ińren dulạṛiạtiń iń sendra baṛayede tahẽkana; ińiń sendrayede tahẽkana, menkhan bạń ńamledea.

² Ińiń hudiskeda, iń do beretʼkate nagrahare, kulhire ar racakoreń dãṛãbaṛaea; iń do onḍe ińren dulạṛiạtińiń sendrayea; uniń sendra ledegea menkhan bạń ńamledea.

³ Nagraharen pahradarko do dãṛã dãṛãte pahrae jokhecʼ ińko ńel ńamkedińa. Iń do onkoń kuliketʼkoa, “Ape do cetʼ ińren dulạṛiạpe ńel akadea?”

⁴ Onkoń paromketʼko khan ińren dulạṛiạtiń doń ńamkedea. Ar uni sapʼkate eṅgạńakʼ oṛakʼte ạuriń ạguiye hạbicʼ bạń aṛakʼledea; ar okoe kukhireye doholediń uniyakʼ oṛakʼtegeń ạgukedea.

⁵ E Jerusalemren kuṛiko, poṭretʼ jel ar posta eṅgako ńutumteń nehõrokʼ kana uniyakʼ okteko ạuri hoyokʼtae hạbicʼ uni do alope buskuyea, ar alope ebhenea.

Jerusalemren hoṛkoakʼ katha:(Kuṛi)

⁶ Hahaṅkar secʼ khon hijukʼkan tutʼ tutʼ dhũạ khunṭi lekanicʼ doe okoekana? Ona dhũạ khunṭire do beparikoakʼ joto lekanakʼ, gondhoros ar kundurute mahkaokʼ jut so mosolako menakʼa.

⁷ Ńelpe ona do Solomonakʼ khuṛkhuṛi kana! Ona khuṛkhuṛi beṛhaete do turuigel birbanṭa menakʼkoa; onko do Israelren joto khon daṛean bir kanako.

⁸ Onko jotoko ṭhen do tarwaṛe menakʼa, ar lạṛhạire jotogeko gạkhuṛgea; onko do ḍanḍare tarwaṛeko tolakada ar ńindạ reakʼ muhin iạte sapṛao menakʼkoa.

⁹ Solomon raj do acʼ lạgitʼge niạ khuṛkhuṛi doe benao ocoleda, ona do Lebanon reakʼ kaṭtegeye benao ocoleda.

¹⁰ Ona khuṛkhuṛi reakʼ khunṭiko do rupạ reakʼ, ar ṭenḍarakʼ do sona reakʼ tahẽkana, ona reakʼ palan do beguni roṅakʼge; ar Jerusalemren kuṛiko do dulạṛte bhitri reakʼ aṭetʼakʼko benaoatʼ tahẽkana.

¹¹ E Sionren kuṛiko, dela oḍok hijukʼpe, ńelpe, Solomon raj do mạ̃ṛteye sajao akana; uniyakʼ baplakʼ dinre, ar uniyakʼ rạskạ dinre, uniren eṅgattetʼ do mạ̃ṛe horokʼ akawadea.