Soros sereń 2 - সান্তালী বাইবেল

¹ Iń do Saron reakʼ mitʼṭecʼ kiyạ baha kạnạń, buru nala reakʼ sikiyạm bahage.

Dulạṛiạwakʼ katha: (Koṛa)

² Rạṅgạini talare sikiyạm baha cetʼleka, onkage juạn kuṛiko talare ińren dulạṛiạ hõ.

Dulạṛiạwakʼ katha: (Kuṛi)

³ Bir dareko talare apel dare cetʼleka, onkage juạnko talare ińren dulạṛiạ hõ. Uniyakʼ umulre duṛupʼkateń rạskạkʼ kana, ar uniyakʼ jo do heṛemgea ińakʼ mocare.

⁴ Uni do manḍawa latarteye aderkedińa, dulạṛ reakʼ nisạnateye umulkedińa ar dulạṛiń reakʼe sodorkeda.

⁵ Kismis jom ocoyińme ar daṛe ocoyińme badam jo jom ocoyińte ṭanḍhayińme ente dulạṛte iń doń latwakʼ akana.

⁶ Leṅga tite uni do bohokʼe ãṭhṛẽketʼtińạ, ar jojom tite doe hạṛupʼkedińạ.

⁷ E Jerusalemren kuṛiko, Poṭretʼ jel ar posta eṅgako ńutumteń nehõrokʼ kana, dulạṛ do alope buskuyea ar alope ebhenea uniyakʼ okteko ạuri hoyokʼ hạbicʼ.

⁸ Ote ańjompe, ińren dulạṛiạwakʼ sabad, hạni ńelepe, uni doe hijukʼ kana; uni do buru boṭkocʼ cetante don donteye hijukʼ kana.

⁹ Dulạṛiạtiń do selepʼ jelren hopon leka. Hạni ńelepe, uni do aleakʼ pạcri tayomreye teṅgo akana, uni do jalna secʼteye ńeleń kana, ar bhurni khone oyoṅ edeńkana.

Dosar sereń: (Koṛa)

¹⁰ Ińren dulạṛiạ do ińe metadińạ, “E ińren dulạṛiạ, ma beretʼme; E mońjicʼ, iń sãote dela hijukʼme.

¹¹ Ńelme rabaṅ dinko do parom akana; ar jạputʼ dinko hõ caba akana.

¹² Ṭạnḍire bahako saṛ akana, ar cẽṛẽkoakʼ sereńko hõ ańjomokʼ kana disạmre mala potamkoakʼ kukuḍubur hõ ańjomokʼ kana.

¹³ Loa darere jo do ehopʼ akana; darkha nạ̃ṛĩko do bahakʼ kana ar onako reakʼ bas do mahkaokʼ kana. E ińren dulạṛiạ, ma beredokʼme; E mońjicʼ tiń, dela iń soṅgete hijukʼme.”

Dulạṛiạwakʼ katha (Kuṛi)

¹⁴ E potamtiń, huṭupʼ dhiri lopakʼre tahenicʼ buru cuṛạ pakhakore menamicʼ, amakʼ rup baṛe ńel ocoyińme, amakʼ aṛaṅ baṛe ańjom ocoyińme, ente am dom cehragea ar aṛaṅ do heṛemgetama.

¹⁵ Ape do khĩkṛĩko sapʼkope, onko kạṭicʼ kạṭicʼ hoponkoge, onko do aboakʼ darkha bagwanko nosṭoyeda; ente darkha nạ̃ṛĩko do bhoṭogokʼ kana.

Dulạṛiạwakʼ katha (Kuṛi)

¹⁶ Dulạṛiạtiń doe ińren kangea ar ińhõ unirenge; uni do sikiyạm baha bagwan talareye gukʼpikana.

¹⁷ E ińren dulạṛiạ, ruạṛ hijukʼme baṛe; tin hạbicʼ baṅ aṅga marsalokʼ ar ńut ạuri cabakʼ un hạbicʼ am do tahenme. Buru rindiṛkore juạn jhaṅkaṛ jel baṛe hoyokʼme, selepʼ jel leka baṛe hoyokʼme.