Sereńko 99 - সান্তালী বাইবেল

Isor do napṛakʼ utạr raj kanae

¹ Probhu Isor doe raj kana; sanam jạtrenko thar tharaokʼma. Uni do Kerubkin cetan siṅghạsonreye duṛupʼ akana; ar dhạrti do dalmalaokʼma.

² Sionreye tahenkan Probhu Isor doe maraṅgea; sanam jạtrenko do uni taberen kanako.

³ Onko jạtrenko do uniko sarhaoema; uni do maraṅ ar botoranicʼ Isor kanae; uni doe sonotgea.

⁴ Okoe raj do dhorom bicạre kusiyakʼ uniyakʼ daṛe do amgem ṭarhao akatʼtaea, jemon uni do dhoromteye bicạr daṛeakʼ. Amge Jakob bõsrenko talare hok bicạr ar dhoromem dohoakada,

⁵ Aboren Probhu Isor sarhaoepe; uniyakʼ jaṅga lebedokʼ ṭhen ikhṛumokʼte ḍobokʼaepe; ente uni doe sonotgea.

⁶ Mose ar Aron hõ uniren naekeko modren kin tahẽkana; okoe uni ṭhenko koejoṅkan tahẽkan onko modre Samuel hõe tahẽkana. Mose, Aron ar Samuel do Probhu Isorko hohowae kan tahẽkana ar uni do onkoe roṛ ruạṛako kan tahẽkana.

⁷ Uni do rimil reakʼ khunṭi khone roṛetʼkan tahẽkana; onko do uniyakʼ katha ar hukumko manaoetʼ tahẽkana.

⁸ E Isor aleren Probhu Isor, am do onkoakʼem ańjometʼ tahẽkana; am do onkoren ikạyicʼ Isorem tahẽkana, menkhan onkoakʼ bedhoromre dom sạjạiletʼkoa.

⁹ Ona iạte aboren Probhu Isor baṛe sarhaoepe; uniyakʼ sonot buru samaṅre ḍobokʼaepe, ente aboren Probhu Isor doe sonotgea.