Sereńko 98 - সান্তালী বাইবেল

Isor do dhạrtiren cakʼlaoicʼ kanae

¹ Probhu Isor ńutumte nãwãnakʼ sereńpe, ente uni do aema hahaṛawakʼkoe kạmi akada; uniyakʼ daṛe, hẽ, uniyakʼ sonot maraṅ daṛete uni doe bańcao akada.

² Probhu Isor do acʼakʼ bańcao reakʼ kạmiye udukʼ akada; sanam jạtrenko samaṅre acʼakʼ dhorom kạmi reakʼe sodor akada.

³ Israel jạtrenko lạgitʼ acʼakʼ asambheṛ dulạṛ ar pạtiạr reakʼ katha uni doe disạ dohoakada; ar aboren Isorakʼ bańcao reakʼ kạmi do goṭa dhạrtiren hoṛko ńelakada.

⁴ Dhạrtiren sanam hoṛ, ape do Probhu Isor ńutumte rạskạkʼpe; ar rạskạte andoṛpe ar sarhao sereńpe.

⁵ Peṛesaṅ banamate ar mońj rạṛte Probhu Isor do sarhao sereńaepe.

⁶ Pẽpṛẽtʼ ar sakwa oroṅate Probhu raj samaṅre rạskạ sereńpe.

⁷ Jalapuri ar onare menakʼ jotoge rạskạteko andoṛma; dhạrti ar onareko tahenkan jotoko rạskạteko andoṛma.

⁸ Sanam gaḍako do thayoateko rạskạkʼma, Buru boṭkocʼ do mitʼ sãoteko rạskạ midokʼma.

⁹ Probhu Isor samaṅre onko do onako onkaema, ente uni do dhạrti bicạr lạgitʼe hijukʼ kana. Uni do dhoromte dhạrti reakʼe bicạra, ar jạtrenko do hok reakʼe bicạrtakoa.