Sereńko 96 - সান্তালী বাইবেল

Isorge napṛakʼ utạr raj

¹ Ape do Probhu Isor ńutumte nãwã sarhao sereńpe; dhạrtiren sanam hoṛko, ape do Probhu Isor ńutumte sereńpe.

² Probhu Isor ńutumte sereńpe, ar uni sarhaoepe; uniyakʼ bańcaokʼ din reakʼ katha porcarpe.

³ Eṭakʼ jạtrenko ṭhen uniyakʼ ṭhonok lạipe; ar sanam hoṛko talare uniyakʼ sanam hahaṛa kạmiko reakʼ katha porcarpe.

⁴ Probhu Isorgeye maraṅa ar sanamko cetanre unige sarhaoanicʼ lek kanae; sanam debotako khon uni doe botorangea.

⁵ Eṭakʼ eṭakʼ jạtren debotako doko ạuṛiyakʼgea, menkhan Probhu Isor do maraṅ serma sirjạuicʼ kanae.

⁶ Man ar mạhima do uni samaṅre; uniyakʼ oṛakʼre do daṛe ar ṭhonokge menakʼa.

⁷ E jạt jạtren sanam gusṭirenko, sanam daṛe ar ṭhonok do Probhu Isorakʼ kangea.

⁸ Sanam sarhaoteakʼ do Probhu Isorakʼ mente aṅgocpe; ar samaṅokʼakʼ jinisko uniyakʼ racare hijukʼpe.

⁹ Probhu Isorakʼ ṭhonokte perecʼ sonot reakʼ katha hudiskate uni manotepe; dhạrtiren sanam hoṛko, ape do uni samaṅre thar tharaokʼpe.

¹⁰ Jạt jạtrenko ṭhen lại sodorpe, “Probhu Isorgeye raj kana mente. Dhạrti do ṭarhao kajak akana, ona do tisge baṅ ḍikạḍakekʼa; uni do dhoromte sanam jạtrenkoe ḍanṭaokoa.”

¹¹ Sermae rạskạkʼma, ar dhạrti doe kusikʼma; jalapuri ar onare menakʼ jotowakʼge hud hudạukʼma;

¹² Ṭạnḍi ar onare menakʼ jotowakʼge rạskạkʼma. Enḍekhan bir reakʼ sanam dare nạ̃ṛĩko hõ rạskạteko sereńa;

¹³ Onko do Probhu Isor samaṅreko sereńa, ente uni doe hijukʼkana. Uni do dhạrtirenko bicạrko lạgitʼe hijukʼkana. Uni do dhoromte dhạrtiye bicạra, ar jạt jạtrenko pạtiạr salakʼe bicạrkatakoa.