Sereńko 95 - সান্তালী বাইবেল

Mitʼṭecʼ sarhao sereń

¹ Dela, Probhu Isor ńutumte rạskạte bon sereńaema; aboren rurukhiyạ buru bon andoṛaema.

² Dela, sarhao sereńate uni samaṅre bon calakʼma, ar õṛhẽ sereńte uni ńutumte bon rạskạkʼma.

³ Probhu kangea maraṅ Isor do; sanam debotako cetanre uni kangeae maraṅ raj.

⁴ Dhạrti reakʼ sanam khạndriyakʼ ṭhạ̃iko do uni tirege menakʼa; ar buru reakʼ cuṛạko hõ uniyakʼ kangea.

⁵ Jalapuri hõ uniyakʼ kangea, ente unige ona doe benao akada; ar ot hõ uniyakʼ titege benao akana.

⁶ Dela, abo do uni bon sewawae ma; aboren sirjạuicʼ Probhu Isor samaṅre bon ikhṛumokʼma.

⁷ Uni kangeae aboren Isor do, ar abo do uniren kana bon; uniyakʼ gupi ṭạnḍiren bhiḍiko leka uni doe ńel sãohayetʼ bona. Ohae, teheń baṛe ińakʼ kathape ańjomletiń khan!

^8-9 Uniye men akada, “Aperen hapṛamko leka apeakʼ ontor do alope keṭejtapea; onko do hahaṅkarre Meribare ar Massa ṭhen ińko biḍạuledińa. Aperen hapṛamko do ińko ńelakadeńre hõ enhõ onko do onḍeko biḍạu aṭkarledińa.

¹⁰ Pongel bochor hạbicʼ ona piṛhirenkote iń do ạḍiń ạṛis cabalena; ińiń menleda, ‘noko hoṛakʼ ontor do eṭakʼ secʼ ghańjeṛ akantakoa; ińakʼ hor do bako baḍaelakʼa.’

¹¹ Ona iạte iń do edreteń kiriạlena, ‘onko do ińakʼ jirạukʼ jaegate baṅgeko bolo ńama.’ ”