Sereńko 94 - সান্তালী বাইবেল

Isor do sanamkoren bikʼcạricʼ kanae

¹ E Probhu Isor, am do hala ruạṛicʼ Isor kanam, E hala ruạṛicʼ Isor, amakʼ marsal baṛe sodorokʼma.

² E dhạrtiren bicạricʼ, de beretʼme; ar bạḍạikoakʼ kuṛại baṛe emkatakom.

³ Ar tinạkʼ din, E Probhu Isor, ar tinạkʼ din bedhorom hoṛko do rạskạ reakʼ ạtko ńama?

⁴ Onkoakʼ moca khon eken bạḍạite perecʼ bulige oḍok hijukʼ kana; onko bedhoromko doko phulạukʼ kana.

⁵ E Probhu Isor, onko do amren hoṛkoko lebetʼ gańjaoetʼkoa; ar amren hoṛko cetanre doko julumeda.

⁶ Onko do rạnḍi dukhi ar upriạ hoṛko sumạrkoa, Ar ṭũạr amarko doko khũnkoa.

⁷ Onkoko meneda, “Note do Probhu Isorakʼ mẽtʼ bạnukʼa; Jakobren Isor do bae moneyakʼa.”

⁸ Orlo hoṛko, ape do luturakʼpe; E bebujko, ape do tispe ạkilokʼa?

⁹ Okoe luture sirjạu akatʼ uni do cetʼ bae ańjomeda? Ar okoe mẽtʼe benao akatʼ uni do cetʼ bae ńeńelkana?

¹⁰ Okoe sanam jạtrenkoe ḍanṭaoetʼko are cetʼakokan uni do cetʼ begor sạjại emokʼteye tahẽ daṛeakʼa?

¹¹ Probhu Isor do manwakoakʼ sanam hudis bundisakʼkoe baḍaegea; uni doe baḍaea, onako joto do ạuṛiyakʼgetakoa.

¹² E Probhu Isor, uni hoṛ doe bhạgangea okoe dom ḍanṭaoede ar amakʼ ạn ạrikom cetʼaekan.

¹³ Uni do muhin hilokʼre dile ńama, one bedhoromko lạgitʼ ghaḍlakʼ ạuri tear sạtokʼ hạbicʼ.

¹⁴ Probhu Isor do tishõ acʼren hoṛko bae bạgi giḍiakoa; okoe doko acʼren bachaoko kan onko do bae giḍi sạṅgińkoa.

¹⁵ Bicạr do dhorom ruạṛokʼa; ar sanam sojhe monan hoṛ do onako pańjaya.

¹⁶ Iń ńutumte bạṛicʼko upạrte do okoeye teṅgokʼa? Iń ńutumte dusṭạmiko do okoeye teṅgo daramkoa?

¹⁷ Probhu Isor bae goṛowạń khan, enḍekhan gujukʼ guṛum disạmre calakʼ do ohoń bilomkea.

¹⁸ Ińakʼ jaṅgakin leńjedokʼ kantińạ menteń hudislere, unrege E Probhu Isor, amakʼ asambheṛ dulạṛ do ińe sapʼ dohoyedeń kana.

¹⁹ Ińakʼ monre bạṛicʼ dạndiko tinre ḍherokʼ kana, unre amakʼ jiwi raṛecʼ reakʼ katha do ińakʼ ontore rạskạ ocoyetʼtińạ.

²⁰ Bạṛicʼ bikʼcạrko do bạṛicʼ kạmi lạgitʼ ạnko teara; onko do cetʼ am sãote jãhãn helmel tahẽ daṛekokʼtakoa?

²¹ Onko do dhorom hoṛko upạrte dolko pakaoa ar dhoromko gujukʼ sạjại emako lạgitʼko dusikoa.

²² Menkhan Probhu Isorge ińren aotan gaṛ do; ar ińren Isorge ińren asray buru.

²³ Onkoakʼ behokakʼ do onko cetanregeye ạguiya, onkoakʼ bedhoromakʼge uni doe cabakoa; aboren Isor Probhu Isorgeye onkakoa.