Sereńko 92 - সান্তালী বাইবেল

Sarhao sereń

^1-3 E Probhu, maraṅ Isor, gel taranakʼ banamte, binạ banam ar peṛesaṅ banamte am sarhaome reakʼ, amakʼ sarhao sereńam reakʼ, ar setakʼre amakʼ asambheṛ dulạṛ reakʼ katha ar ńindạ jokhecʼ amakʼ pạtiạr reakʼ katha lại jạhir do samani rạskạ reakʼ kana!

⁴ E Probhu Isor, amakʼ kạmi do ińe rạskạ ocoyediń kana; ar amakʼ sanam kạmiko iạte iń do rạskạteń sarhao sereńama.

⁵ E Probhu Isor, amakʼ kạmiko do ạḍi bhagegea ar amakʼ hudisko hõ ạḍi khạndrigea!

⁶ Orlo hoṛ do ona bae baḍae daṛeakʼa; ar bebuj hoṛ hõ ona do bae bujhạu daṛeakʼa.

⁷ Bedhorom hoṛko do ghãs lekako hara rakabokʼ kana ar dusṭạmi kạmikanko do usạrateko phulạukʼ kana enhõ onko do jaejug lạgitʼko marao utạrokʼa.

⁸ Menkhan E Probhu Isor, am do jaejug hạbicʼ coṭrem tahẽna.

⁹ E Probhu Isor, amren bạiriko doko maraokʼa, hẽ, onko doko caba utạrokʼa; ar dusṭạmiko do jotogeko chirchạturokʼa.

¹⁰ Bir sanḍakʼ usul dereń leka am do ińakʼ bohokʼem usul akatʼtińạ; ar rạskạ salakʼ nãwã sunumte ińem ojokʼ akadińạ.

¹¹ Ińren bạirikoakʼ bhagao do nij mẽtʼteń ńelakada; okoe iń upạrteko teṅgo akan onko bedhorom hoṛkoakʼ rakʼjoṅ iń do nijakʼ luturteń ańjom akada.

¹² Dhorom hoṛ do khijur dare lekae ḍagḍagaokʼa; uni do Lebanon reakʼ debdạru dare lekae hara rakapʼa.

¹³ Aboren Probhu Isorakʼ oṛakʼre okoeko rohoe ocoakan onko do uniyakʼ racareko hara rakabokʼa.

¹⁴ Ar haṛam umạr hạbicʼ hõko jo bahakʼa; onko do soros ar purṭhạko hoyokʼa.

¹⁵ Onate porcarokʼa, Probhu Isor doe dhoromgea; unige ińren daṛe do ar unire jãhãn behok do bạnukʼa.