Sereńko 91 - সান্তালী বাইবেল

Isorge aboren rurukhiyạyicʼ

¹ Maraṅ Isorakʼ hirlạre okoye tahenkan uni do sanam daṛeanicʼakʼ umulreye tahẽnkana.

² Probhu Isor reaṅ do noageń mena, “Unige ińren asray ar ińren gaṛ do; uni kangea ińren Isor do one unireń ṭehãḍakan.”

³ Uni do sesendrakoakʼ pạsi khon ar maraokʼ reakʼ ti khone rukhiyạmea.

⁴ Acʼakʼ ilkoteye guṅgutʼ esetʼmea, ar uniyakʼ phạ̃kṛạ̃kʼ latarre am do asrayem ńama; uniyakʼ pạtiạrtetʼ do amakʼ ḍhal ar hoṛmo aḍokʼakʼ phirikana.

⁵ Ńindạ reakʼ muhin ar din reakʼ toras do bam botorakʼ kana;

⁶ bam botorakʼ kana ńindạ reakʼ mahamạri do se tikin jokhecʼ reakʼ jarkharakʼko hõ.

⁷ Hoedaṛeakʼa am pantere hajar hoṛ ar eṭakʼ pantere do gel hajar hoṛko gurlenre hõ noako do am ṭhen baṅge hijukʼa.

⁸ Bedhorom hoṛko cetʼleka kuṛạiko ńam ona do eken mẽtʼtem ńela.

⁹ “E Probhu Isor, amge ińren hirlạ do.” Am dom goṭa ṭhik akada maraṅ Isorge amren hirlạ kanae;

¹⁰ onate amakʼ jãhãn sorbonas do baṅ hoyokʼa, ar amakʼ oṛakʼ cetanre jãhãn jhãpko hõ baṅ hijukʼa;

¹¹ ente uni do acʼren goḍetko am reaṅe hukumakoa onko do sanam horkore amko horhomea.

¹² Onko do titeko sepeńmea jemon dhirire jaṅga alo bajaokʼtam.

¹³ Am do kul ar kạrinạṅgiń biń cetantem taṛama, ar dhạcri kul ar biń kidińkom lebetʼ gańjaokoa.

¹⁴ Probhu Isore meneda, “Dulạṛte okoye sabeńkan, uni doń rukhiyạyea; ar muhin khoniń bańcaoea, ente uni do ińe oromakadińạ.

¹⁵ Uniye hohowạńreń ańjomtaea; ar muhinre uni sãoteń tahena; uni doń rukhiyạyea ariń manotea.

¹⁶ Ar ạḍi diniń bahaoeteń purun ocoyea; ar ińakʼ babańcaoiń ńel ocoyea.”