Sereńko 90 - সান্তালী বাইবেল

Ponakʼ puthi (Sereńko 90-106) Isor ar Manwa reaṅ

¹ E Probhu Isor, piṛhike piṛhi am kangeam aleren thamgạḍi do.

² Buru boṭkocʼ ạuri sirjạukʼre, dhạrti ar pirthimi ạuri sirjạukʼre, ona laha khon jaejug hạbicʼ am kangeam Isor do.

³ Manwa do dhuṛitem ruạr idiyede kana; amem meneda, “E manwa hoponko, ape do arhõ dhuṛite ruạṛokʼpe.”

⁴ Amakʼ nońjorre hajar bochor parom calaoen do, holanokʼ din leka kana.

⁵ Am do manwako ḍubạ dakʼtem ạtu idiyetʼkoa, onko do kukmũ baragge; onko do tolmojokʼ ghãs lekanako.

⁶ Setakʼre ona do bahakʼa; ar ạyupʼ do tolmojokʼa, ar rohoṛ cabakʼa.

⁷ Amakʼ edrete ale dole ses cabakʼkana; amakʼ jolokʼkan edrete ạḍile botorokʼ kana.

⁸ Aleakʼ ghạṭko do am samaṅrem dohoakada; amakʼ mẽtʼãhã reakʼ marsalte aleakʼ oko danaṅ kạiko sodorokʼ kana.

⁹ Amakʼ botoranakʼ edre talate aleakʼ din do parom calakʼkana; ar sahẽtʼ lekage aleakʼ bochorko hõ caba hijukʼ kana.

¹⁰ Aleakʼ bahaokʼ din do eken eae gel bochor, ar ḍher khan do irạlgel bochor hõ hoyokʼa; aleakʼ bahaokʼ din jãhãtinạkʼ dinge hoyokʼ onare do eken duk ar kosṭoge menakʼa; bochor do parom calao godokʼkana ar ale hõle maraokʼkana.

¹¹ Amakʼ edre reakʼ daṛe do okoeye bujhạu daṛeakʼa? Tinạkʼ hoṛakʼ ontorre bhoti menakʼte, amakʼ raṅgaoko bujhạu daṛeakʼa?

¹² Enḍekhan bujhạu ocoleme, aleakʼ bahaokʼ din do thoṛa getalea mente, jemon aleakʼ ontor do akelte perejokʼtale.

¹³ E Probhu Isor, ar tinạkʼ din? Ma ruạṛokʼme, amren golamkore mãyãkʼme.

¹⁴ Amakʼ nãwã dulạṛte baṛe tirpitlem, jemon rạskạtele sereń daṛeakʼ ar kusite jionle khemao daṛeakʼ.

¹⁵ Tinạkʼ din khon aleakʼ bạḍại rạpud lạgitʼem kạmikana, ar tinạkʼ bochor dukrele tahẽkan, unạkʼ din am do sukre dohokaleme.

¹⁶ Amren golamko ṭhen amakʼ kạmi ar onkoren gidrạko ṭhen amakʼ ṭhonok sodorme baṛe.

¹⁷ Aboren Probhu Isorakʼ daya do abo cetanre baṛe tahen ma; aleakʼ sanam kạmi kajaktaleme, hẽ, aleakʼ sanam kạmi baṛe kajak utạrtaleme.