Sereńko 9 - সান্তালী বাইবেল

Hok bicạr ńutumte gunmanao

¹ E Probhu Isor, ińakʼ goṭa ontorte amiń gun manao joharam kana ar amakʼ joto hahaṛa kạmi reakʼ kathań lại sodora.

² Iń do amrege hulạs ariń rạskạkʼa. E maraṅ Isor, amakʼ ńutumteń õṛhẽ sereńa.

³ Ińren bạiri doko pạc ruạṛ akana; onko do am samaṅreko tohotʼ bhindạṛena arko marao akana;

⁴ ente am do ińakʼ mambla dom bicạr chinḍạu akatʼtińạ; ar amakʼ siṅghạsonre duṛupʼkate dhoromtem bicạr akada.

⁵ Am do eṭakʼ jạtrenkom dhomkaoetʼkoa ar bedhoromko dom nosṭoyetʼkoa; onkoakʼ ńutum do jaejug hạbicʼem mohor meṭao akatʼtakoa.

⁶ Ar bạiriko do jaejug lạgitʼko jarkharena; onkoakʼ nagrahako dom dhaṅdhaser akada; ar onkoakʼ ńutum sudhạ marao cabayentakoa.

⁷ Probhu Isor do jaejug hạbicʼe rajokʼkana; uni do bicạr reakʼ siṅghạsone bạisạu akada.

⁸ Uni do dhoromte dhạrtirenkoe bicạrkoa, ar sanam jạtrenko hõ dhoromtegeye ḍanṭaokoa.

⁹ Okoe santaoreko paṛao akan, Probhu Isorge onkoren asray doe hoyokʼma ar gạr jokhecʼren do aotan gaṛge.

¹⁰ Am okoeko baḍae akatʼme onko do amregeko hirlạ joṅma, E Probhu Isor, ente okoe khạndri hạbicʼ baḍaemeko khojkan, onko do tis hõ bam bạgi giḍi akatʼkoa.

¹¹ Probhu Isor do Sionre menaea; ape do unige õṛhẽ sereńaepe. Ar uni okae kạmiakatʼ ona do eṭakʼ jạtrenko ṭhen lại sodorpe;

¹² ente mãyãm reakʼ okoeye hala hạliy uni do gocʼ ocoakan hoṛko hõ bae hiṛiń akatʼkoa, ar dukokʼ kankoakʼ rakʼ joṅ hõ bae ḍhilạutakoa.

¹³ E Probhu Isor, dayawạńme baṛe; ar ńelme, bạiriko cetʼlekako santao edeńkana. Moron reakʼ duạr khon do amge rakapʼ ruạṛińme,

¹⁴ jemon Sion kuṛi reakʼ phaṭok duạrkore amakʼ man ar mạhimań pasnao daṛeatam ar amakʼ bańcao ńamkate jemoniń rạskạ daṛeakʼ.

¹⁵ Eṭakʼ jạtrenko do apnarko la akatʼ ghaḍlakʼregeko khańjokʼ kana; ar akoko oḍao akatʼ jhạliregeko jhạlikʼ kana.

¹⁶ Dhorom bicạr hotetege Probhu Isor doe baḍae ocokʼkana; bedhoromko do akoakʼ kạmitegeye jhạliyetʼkoa. (Sela)

¹⁷ Okoe jạtrenko do Isorko hiṛińedekan onko bedhoromko do gocʼkate patal puriteko calakʼa.

¹⁸ Reṅgecʼ orecʼko do jaejug hạbicʼ bako hiṛińokʼa; ar nindhạnkoakʼ as do tishõ be as do baṅ tahena.

¹⁹ E Probhu Isor, de teṅgonme manwa do am cetanre alom jitạu ocokoa; am samaṅrege eṭakʼ jạtrenkoakʼ bicạr do hoyokʼma.

²⁰ E Probhu Isor, onkoakʼ ontorre botor rakapʼ ocoy takome; ar eṭakʼ jạtrenko baḍaema, onko hõ eken manwa kangeako mente. (Sela)