Sereńko 89 - সান্তালী বাইবেল

Disạm muskilre paṛaoen okte reakʼ sereń

¹ Iń do jaejugge Probhu Isorakʼ asambheṛ dulạṛ reakʼ iń sereńa; ar bõske bõs sanamko samaṅre amakʼ pạtiạrtetʼ reakʼ kathań lại jạhira.

² Ińiń lại saḍea je, amakʼ dulạṛ reakʼ kạmi do jaejug hạbicʼ borket idikʼkana mente; ar amakʼ pạtiạrtetʼ do sermarem bạisạu akada.

³ Am dom menakada, “Ińren bachao hoṛko lạgitʼ iń do mitʼṭecʼ bondobosiń bandhao dohoakada; ińren golam Dạud ṭhen iń do noań kiriạ akana,

⁴ ‘amakʼ bõs do jaejug hạbicʼ iń teṅgo keṭeja; ar piṛhike piṛhi amakʼ siṅghạsoniń ṭarhao dohoya.’ ” (Sela)

⁵ E Probhu Isor, serma reakʼ sanamakʼ do amakʼ maraṅ kạmi reakʼe oṛhẽ sereńetʼkana, sonot goḍetko talare amakʼ pạtiạrtetʼko sarhaoeda.

⁶ Sermare nonkan cele menakʼkoa okoe do Probhu Isor sãoteye jurikokʼa? Serma goḍetko modre Probhu Isor soman do okoe menaea?

⁷ Sonot goḍetkoakʼ bạisire sanamkoge Isor do botor arko bhoktiaea; uni beṛhaeten sanamko khon uni kangeae ḍher botoranicʼ do.

⁸ E Probhu, sanam daṛean Isor, okoe menaea am lekan daṛeanicʼ do, E Probhu? Amakʼ pạtiạrtetʼge am doe esetʼ ạcur akatʼmea.

⁹ Jalapuri reakʼ ḍheoko do amakʼ ḍanṭaore menakʼa; ar ona reakʼ ḍheoko rakapʼlenre am dom ḍelḍel ocoyeda.

¹⁰ Rahab do gocʼicʼ leka amgem chaka chun akadea; am daṛeanakʼ tite amren bạirikom chirchạtur akatʼkoa.

¹¹ Serma hõ amakʼge ar dhạrti hõ amakʼge; ot ar ona reakʼ jotowakʼge amem benao akada.

¹² Utạr ar dạkhin do amakʼ sirjạukangea; Tabor ar Hermon buru do am iạte rạskạte kin sereńeda.

¹³ Amakʼ ti do ektiạrite perecʼgea; amakʼ tire do daṛe menakʼa, ar amakʼ jojom ti reakʼ daṛe do ohoge tulạulena.

¹⁴ Dhorom ar hok cetanre amakʼ siṅghạson do teṅgo akana; dulạṛ ar sạriyakʼtetʼ do am laha lahate calakʼ kana.

¹⁵ Bhạgangeako onko hoṛ do, okoe do ona rạskạ aṛaṅko ańjomakatʼ; E Probhu Isor, amakʼ mẽtʼãhã reakʼ marsalte onko doko dãṛãn kana.

¹⁶ Goṭa dinge am iạteko rạskạkʼ kana; amakʼ dhoromge onko do coṭteye rakapʼetʼkoa.

¹⁷ Amge coṅ onkoakʼ daṛe reakʼ mońjtetʼma; amakʼ dayatege aleakʼ daṛe reakʼ dereń do coṭteye rakapʼ akantalea.

¹⁸ Aboren raj do Israelren uni sonoticʼe bahal akadea; aboakʼ ona ḍhal do Probhu Isorgeye bahal akadea.

¹⁹ Mitʼ dhao am do dorsonte am botoramkom metatʼko tahẽkana, “Iń do mitʼṭen birbanṭa hoṛiń goṛo akadea; ar onko mod khon mitʼ hoṛiń bachaoante coṭteń rakapʼ akadea.

²⁰ Ińren golam Dạud doń sendra ńam akadea; ar ińakʼ sonot sunumteń ojokʼ bahalkedea.

²¹ Ińakʼ daṛeanakʼ ti do uni sãote tahena; ińakʼ tige uni do daṛeye danaea.

²² Okoe bạiri hõ uni cetan do bako rakapʼ daṛeakʼa; ar okoe bạṛicʼ hoṛ hõ uni do bako santao daṛeaea.

²³ Uni samaṅrege iń do uni upạrtenkoń chirchạturkoa ar okoe uniko hirkhạwae onko doń maraokoa.

²⁴ Ińakʼ pạtiạu ar asambheṛ dulạṛ do uni sãote tahena; ar ińakʼ ńutumtege uniyakʼ daṛe dereń do coṭte rakabokʼa.

²⁵ Iń do jalapuri ar gaḍako cetanre ektiạriń emaea.

²⁶ Uni do hohowạńteye mitạńa, ‘amge ińren Baba do, ińren Isor, ar ińren aotan buru.’

²⁷ Uni do ińren pạhilicʼ hoponiń hoeocoyea; Dhạrtiren rapajko modre uni doń maraṅea.

²⁸ Jaejug hạbicʼ uni lạgitʼ ińakʼ dulạṛ do tahena; uni lạgitʼge ińakʼ bondobos do ṭikạu tahena.

²⁹ Iń do uniren bõsko jaejug hạbicʼ iń doho idikoa; tinạkʼ din serma tahena unạkʼ din uniyakʼ siṅghạson hõ tahena.

³⁰ Uniren gidrạko ińakʼ hukum khonko pharaklen khan ar ińakʼ ạn bako manao lekhan,

³¹ ar ińakʼ ạnko bemanot khan ar ińakʼ hukum bako senakʼ khan

³² enḍekhan iń do ṭheṅgate kại reakʼ sạjạiyiń emakoa, ar onkoakʼ bedhorom iạte hõń sạjạikoa.

³³ Menkhan ińakʼ asambheṛ dulạṛ do uni cetan khon bạń ocoga; ar ińakʼ pạtiạrtetʼ do bạń ạuṛiyakʼ ocoya.

³⁴ Ińiń dohoakatʼ bondobos do bạń rạpuda; ińakʼ moca okae menetʼkan ona do bạń bodola.

³⁵ Ińakʼ sonot gokʼakʼte iń do mitʼ dhaogeń roṛ dohoakada iń do Dạud ṭhen tisge eṛe do bạń roṛa;

³⁶ Uniren bõsko do jaejug hạbicʼko tahena; ar uniyakʼ siṅghạson do iń samaṅre siń cando leka tahena.

³⁷ Serma reakʼ pạtiạr ńindạ cando lekage ona do jaejug lạgitʼ tear dohokʼa.” (Sela)

³⁸ Menkhan am dom bạgi giḍi akadińạ, arem nihạ̃t akadińạ; amge ojokʼicʼ hoṛ upạrtem raṅgao akana.

³⁹ Amren golam lạgitʼ oka bondobosem dohoakatʼ ona dom hirkhạ akawada; ar ona reakʼ mukuṭ do dhuṛire giḍikatem be sonotakada.

⁴⁰ Uniyakʼ rurukhiyạ bhit dom rạputʼ giḍiakada; ar ona reakʼ sanam gaṛ dom marao akada.

⁴¹ Ar uniyakʼ disạm aṛeteko parom calakʼ hoṛ do jotowakʼko luṭ iditaea; ar acʼ aḍepase jạtrenko ṭhen do landa dhutʼicʼe hoyakana.

⁴² Amge uni upạrtenko do daṛeankom hoyoco akatʼkoa; ar uniren bạiriko dom rạskạ ocoakatʼkoa.

⁴³ Am do uniyakʼ tarwaṛem bhotṛo ocoakatʼtaea; ar lạṛhạire uni do bam jitạu ocoadea.

⁴⁴ Uniyakʼ jakjomok dom caba utạrkatʼtaea; ar uniyakʼ siṅghạson dom gejerketʼtaea.

⁴⁵ Uniyakʼ juạn reakʼ dinkom komao ketʼtaea, ar lajaoakʼtem dapal akadea. (Sela)

⁴⁶ E Probhu Isor, ar tinạkʼ din? Jaejugge cetʼ am do okogem tahena? Ar tinạkʼ din amakʼ edre do seṅgel lekam jol ocoytama?

⁴⁷ Hudisme ińakʼ jion do tinạkʼ huḍińgea; ar cetʼ ạuṛiyakʼ lạgitʼ manwa dom benao akatʼkoa?

⁴⁸ Okoe kanae uni daṛean hoṛ do, okoe do jiwetʼge menae ar bae gujukʼ? Nonkan okoe menakʼkoa, okoe do patal puri khon apnarteye rukhiyạ daṛekokʼ? (Sela)

⁴⁹ E Probhu Isor, okayena amakʼ ona asambheṛ dulạṛ do? Amakʼ pạtiạrtetʼ khạtirte ona dulạṛ reakʼ gokʼakʼ oka do Dạud ṭhenem onkaletʼ.

⁵⁰ E Probhu Isor, amren golame henosta ocolenre ona reakʼ baṛe disạime; disạime, eṭakʼ jạtrenkoakʼ ona henosta cetʼleka iń do koṛamreń hobor baṛayetʼkana.

⁵¹ E Probhu Isor, amren bạirikoge ona doko henosta akada; ar amren ojokʼicʼ hoṛ hõ uniyakʼ sanam taṛam pańjare.

⁵² Jaejugge Probhu Isorakʼ sarhao hoyokʼtae ma! Amen, Amen.