Sereńko 88 - সান্তালী বাইবেল

Goṛo ńam lạgitʼ rakʼ

¹ E Probhu, ińren babańcaoicʼ Isor, iń do siń sạṭupʼ am ṭheniń rakʼetʼkana.

² Am samaṅre ińakʼ koejoṅ baṛe hạjirokʼma; am do ińakʼ koejoṅ ańjomtińme;

³ Ente ińakʼ ontor do dukte perecʼgea; ińakʼ jiwi do patal puri hạbicʼ sen akana.

⁴ Okoe patal puriteko calakʼa onko modre iń hõń lekha ocoakana; ar daṛeanicʼ iń hoyakanre hõ iń doń nijor akana ar daṛe bạnukʼtae hoṛ lekageń hoyakana.

⁵ Iń do patal purireń khadle giḍi ocoakana; iń do gocʼicʼ, topareye giticʼ akan hoṛ lekageń hoyakana, ar okoekoakʼ katha am do bam disạyetʼ, onko do amakʼ ti khonko getʼ begarakana.

⁶ Am do patal puri reakʼ latar utạr jaegarem doho akadińạ, ar kaṛaṅ kucạṅ ńutrem doho akadińạ.

⁷ Amakʼ edre do iń cetanre menakʼa; amakʼ sanam edre reakʼ ḍheote am do ińem tạpukʼ edeńkana. (Sela)

⁸ Ar am do ińren hoṛko iń ṭhen khonem idiakatʼkoa; ar onko ṭhen do hirkhạwạnicʼem hoyoco akadińạ. Iń doń esetʼ akana, ar bạń oḍok hecʼ daṛeakʼ kana;

⁹ Duk ar kosṭote ińakʼ mẽtʼ do dhund caba akantińạ. E Probhu Isor, dinạm hilokʼ amiń hohowam kana; iń do am secʼ tiyiń tiyạr akatʼtińạ.

¹⁰ Okoeko gocʼakan, onko lạgitʼ do cetʼ hahaṛawakʼem kạmi akada? Gocʼko do beretʼkate cetʼ amko õṛhẽmea? (Sela)

¹¹ Topare amakʼ asambheṛ dulạṛ ar norokre pạtiạr reakʼ katha do cetʼ porcarokʼ tama?

¹² Ńut jaegare cetʼ amakʼ hahaṛa kạmiko do bujhạukʼgea? Oka disạmren hoṛ do hoṛko hiṛińko onḍe do cetʼ amakʼ dhorom reakʼ kạmiko bujhạukʼgea?

¹³ E Probhu Isor, iń do am ṭhen goṛo ńam lạgitʼ iń rakʼeda; setakʼre am ṭhen ińakʼ koejoṅ do seṭerokʼkana.

¹⁴ E Probhu Isor, cedakʼem bạgi giḍiwạń kana? Amakʼ mẽtʼãhã do cedakʼem betʼakatʼtama?

¹⁵ Gidrạ khonge iń do dukreń tahenkana ar gujukʼ dạkhilreń paṛao akana. Amakʼ botoranakʼ sạjại do iń cetanre pheḍ hecʼakana; iń do ạḍitetʼgeń aschuṭạukʼ kana.

¹⁶ Amakʼ botoranakʼ edre do iń cetante parom calao akana; ar amakʼ botoranakʼ uyukʼ do ińe seskedińa.

¹⁷ Onako do dakʼ leka siń sạṭupʼ ińe esetʼ ạcurakadińạ, ar purạteye unum caba akadińạ.

¹⁸ Ińren gateko ar ińren dulạṛiạko do, iń ṭhen khonem idiakatʼkoa; ar ńitokʼ do ńutkangeae ińren gate.