Sereńko 86 - সান্তালী বাইবেল

Goṛo ńam lạgitʼ koejoṅ

¹ E Probhu Isor, ińakʼ katha luturakʼtińme ar roṛ ruạṛạńme, ente iń do nandan ariń nacargea.

² Ińakʼ jiwi bańcaotińme, ente iń do amren bhokto kạnạń; E ińren Isor, okoe golam amreye bhorsakʼkan uni baṛe rukhiyạyem.

³ E Probhu Isor, iń iạte dayakʼme, ente iń do goṭa din amgeń hohowam kana.

⁴ Amren golamakʼ monre rạskạ danạńme, ente E Probhu Isor, ińakʼ ontor do am secʼgeń rakapʼ akatʼtińạ.

⁵ E Probhu Isor, am do bhạlạiyicʼ arem dayayicʼ kana; ar okoe amko hohoam onkore do dayatem perecʼgea.

⁶ E Probhu Isor, ińakʼ koejoṅ ańjomtińme; ar ińakʼ nehõrjoṅakʼ luturakʼtińme.

⁷ Muhinre amiń hohoama, ente am do ińem roṛ ruạṛạńạ.

⁸ E Probhu Isor, debotako modre am lekan do cele hõ bạnukʼkoa; amakʼ kạmi sãote eṭakʼ jãhãn kạmi reakʼ hõ ohoge jurikokʼa.

⁹ E Probhu Isor, amakʼ sirjonren sanam jạtrenko do hecʼkate amko manotmea arko ḍobokʼama; ar amko sarhao sereńama.

¹⁰ Am dom maraṅgea ar hahaṛawakʼkom kạmikana; eken amkagem Isor do.

¹¹ E Probhu Isor, amakʼ hor reaṅ cetʼạńme baṛe, jemon amakʼ sạri horteń taṛam daṛeakʼ; ar am sewawam lạgitʼ ińakʼ bar monan ontor baṛe mitʼ kạtińme.

¹² E Probhu, ińren Isor, ińakʼ goṭa ontorte amiń sarhaomea; ar jaejugiń õṛhẽ sereńama.

¹³ Iń lạgitʼ amakʼ asambheṛ dulạṛ reakʼ simạ do bạnukʼa; patal puri reakʼ latar utạr jaega khon am do ińakʼ jiwim rukhiyạ akatʼtińạ.

¹⁴ E Isor, bạḍạiko do iń upạrteko teṅgo akana; ar sasantaoko do ińakʼ jiwi hatao lạgitʼko kurumuṭu kana. Am lạgitʼ onko hoṛ do jãhãn bhoktige bạnukʼtakoa.

¹⁵ Menkhan E Probhu Isor, am do mãyãte perecʼ dayayicʼ Isor kanam; am do usạrate bam edre hodokʼa, amakʼ asambheṛ dulạṛ ar pạtiạrtetʼ reakʼ mucạtʼtetʼ do bạnukʼa.

¹⁶ Am do iń secʼ ạcurokʼme ar dayawạń me; amren golam baṛe daṛe danaeme; amren kạ̃ṛmĩren hopon rukhiyạyeme.

¹⁷ Amakʼ bhạlại reakʼ sana menakʼ ona baṛe sạbudme, jemon iń hirkhạwạńko do ona ńelte lajaoko ńam; ente E Probhu Isor, amge ińem goṛoakadińạ ar jiwi raṛecʼem imạńkana.