Sereńko 85 - সান্তালী বাইবেল

Disạm hoṛakʼ bhạlại lạgitʼ koejoṅ

¹ E Probhu Isor, amakʼ disạm lạgitʼ do dayam udukʼ akada; am do Jakob acʼakʼ bondi dosa khonem ruạṛ ạguakadea.

² Amren hoṛkoakʼ bedhorom dom ikạ akatʼtakoa; ar onkoakʼ sanam kại dom dapalketʼtakoa. (Sela)

³ Amakʼ sanam bumhạukʼkan edre dom sạṅgiń giḍi akada ar amakʼ jolokʼkan edre khonem ruạṛ akana.

⁴ E aleren babańcaoicʼ Isor, am do lahate leka beretʼ ruạṛlem; ar alere menakʼ amakʼ edre baṛe ocogtam.

⁵ Jaejugge cetʼ ale cetanre am do edre akanem tahena? Piṛhike piṛhi am do cetʼ alere bekusi akangem tahena?

⁶ Amren hoṛko am iạte jemonko rạskạ daṛeakʼ onate cetʼ onko do bam jiwetʼ ruạṛkoa?

⁷ E Probhu Isor, amakʼ asambheṛ daya baṛe udukʼaleme ar ale bańcaoleme.

⁸ Probhu Isor okaṭakʼe mitạń iń do onageń ańjoma; uniren hoṛko ṭhen, uni botoraeko ṭhen uni do suluk reakʼ kathae roṛa; menkhan onko do lelha secʼ ar aloko ruạṛma.

⁹ Okoe uniko botoraekan sạrige uniyakʼ bańcao reakʼ okte onko ṭhen do hecʼ akana; onate uniyakʼ ṭhonok do aboakʼ disạmre girobasokʼa.

¹⁰ Asambheṛ dulạṛ ar pạtiạr dokin ńapam midokʼa; dhorom ar suluk dokin cokʼ joṅa.

¹¹ Disạmre ot khon sạriyakʼ do omon oḍokokʼa; ar serma khon dhorom do latar secʼe oyoṅa.

¹² Okaṭakʼ bhageakʼ kan Probhu Isor do sạrige onae emokʼa, ar aboakʼ disạm do phosole danakʼa.

¹³ Bedhorom do uni laha lahateye calakʼa; ar uniyakʼ taṛam lạgitʼ hore benao idiya.