Sereńko 84 - সান্তালী বাইবেল

Isorakʼ oṛakʼ lạgitʼ ahkaokʼ

¹ E sanam daṛeanicʼ Probhu Isor, napaegea amakʼ tahen ṭhạ̃i do!

² Ińakʼ jiwi do Probhu Isorakʼ oṛakʼ reakʼ raca ńel lạgitʼe chaṭ pahṭaokʼ kana, ar ona iạte ińakʼ jiwi do oḍokokʼ kana; jiwetʼ Isor lạgitʼ ińakʼ hoṛmo ar mon do rạskạteye andoṛeda.

³ E sanam daṛeanicʼ Probhu Isor, ińren raj, ar ińren Isor, amakʼ pinḍ sorrege ghaṛwa cẽṛẽ do oṛakʼko ńam akada, ar bhạluạ cẽṛẽ hõ hopon dohoko reakʼ tukại ńam akada.

⁴ Bhạgangeako onko do, one okoe do amakʼ oṛakʼreko tahẽnkan; onko do sanam ghạṛicʼ amgeko sarhaomea. (Sela)

⁵ Bhạgangeako onko do okoe am ṭhen khon daṛeko ńam. Bhạgangeako onko do, okoeyakʼ ontorre Sion calakʼ reakʼ hudis menakʼtako.

⁶ Onko do rakʼjoṅ lodam talate calakʼ jokhecʼ ona jaega do dakʼ jharnako hoyocoyeda; ar laha dakʼ do borkot iạte onae perecʼeda.

⁷ Calakʼ horre onko do daṛe cetan daṛeko ńameda; onko do Sionre Isor samaṅreko ńel ocokʼkana.

⁸ E Probhu, sanam daṛeanicʼ Isor, ińakʼ koejoṅ ańjomtińme; E Jakobren Isor, ińakʼ katha luturakʼme baṛe. (Sela)

⁹ E Isor, aleakʼ ḍhal beṅgetʼakʼme; amren ojokʼicʼakʼ mẽtʼãhã beṅgetʼataeme.

¹⁰ Eṭakʼ jaegare hajar din khemao khon amakʼ oṛakʼ reakʼ racare mitʼṭecʼ din khemaoge ḍher bhagea; bạṛicʼ hoṛkoakʼ tạmbure ḍerakʼ khon bickom ińren Isorakʼ duạr ṭhen teṅgo tahenge ḍher bhagea.

¹¹ Sạrige Probhu kangea siń cando ar ḍhal do; uni do daya ar ṭhonoke emokʼkana. Okoe dhoromteko calakʼ onko do bhage jisin emako uni do bae baṅakoa.

¹² E sanam daṛeanicʼ Probhu Isor, okoe amreye bhorsakʼ kan uni doe bhạgangea.