Sereńko 83 - সান্তালী বাইবেল

Israelren bạiriko bhagaoko lạgitʼ koejoṅ

¹ E Isor, alom duṛupʼ hapekokʼa; E Isor, am do moca alom bondtama, roṛme baṛe.

² Ńelme, cetʼleka amren bạiri doko hạnḍrạukʼkana ar okoe amko hirkhạwam kan onko do bạḍạite bohokʼ rakapʼkateko teṅgo akana.

³ Amren hoṛko upạrte onko doko solhayeda, ar amem rukhiyạyetʼko upạrteko soṛojontro kana.

⁴ Onkoko meneda, “Dela, jạtrenko bon marao cabakoa, jemon Israelakʼ ńutum aloko disạ dohoy.”

⁵ Onko doko mitʼakana arko soṛojontro kana; ar am upạrte bondobosko bandhaoetʼ kana

⁶ tạmbukore ḍera akan Edomrenko, Ismaelrenko, Moabrenko ar Hagriko,

⁷ Gebaliko, Amonrenko, Amalekiko ar Turren sãoten Philisṭiko;

⁸ onko do Ạsurrenko sãoteko mitʼakana ar Loṭren hoponko reakʼ sopoko hoyakana. (Sela)

⁹ Am do Midiạnrenko okam cekaletʼko, Kison gaḍa aṛeren sisko ar Jabinko leka nokore hõ onkaeme baṛe.

¹⁰ Sisrenko ar Jabin Endorreko mohor meṭaoena; onko do jumi reakʼ guricʼ lekako ńur tahẽyena.

¹¹ Onkoren cetan hudạren hoṛkoakʼ dosa do Oreb ar Sib lekakome baṛe; ar onkoren disạm cakʼlaokoakʼ dosa hõ Sebah ar Salmuna leka hoyocoe me.

¹² Onko bạirikoko menleda, “Dela bon, ạidạrijoṅa Isorakʼ tahen ṭhạ̃ikoge.”

¹³ E ińren Isor, am do hoe bharḍo lekakom, one hoete oṭaṅokʼkan bhusạ lekage.

¹⁴ Birre seṅgel lagaolenre cetʼleka dareko lokʼa ar seṅgel reakʼ lepʼ do cetʼleka burukoe lo ataretʼ,

¹⁵ onkage amakʼ birbão hoete onko khudạukom; ar amakʼ birbão hoete heṛan botor rakapʼ ocoytakome.

¹⁶ Onkoakʼ mẽtʼãhã do lajaote perejtakome, jemon E Probhu Isor, onko do amko hohowam.

¹⁷ Onko do jaejug lạgitʼko lajao arko botorokʼma; onko do bemanot ocokʼteko marao utạrokʼma.

¹⁸ Jemonko baḍae daṛeakʼ, amakʼ ńutum do Probhu kana mente, hẽ, eken am kangeam goṭa dhạrtiren maraṅ Isor do.