Sereńko 81 - সান্তালী বাইবেল

Porob lạgitʼ sereń

¹ Isor, okoe doe aboren daṛeanicʼkan, ape do uni sarhao sereńaepe; ar Jakobren Isor lạgitʼ õṛhẽ sereńpe.

² Oṛhẽ sereń ehobpe, ar tobla saḍe ocoype; mońj peṛesaṅ banam salakʼge.

³ Aboakʼ porob din reakʼ ambasre ar kunạmire sakwa oroṅpe;

⁴ ente ona kangea Israelkoakʼ niạm, Jakobren Isorakʼ ạn do.

⁵ Uni do sạjại emokʼ lạgitʼ Misor disạm talate tinreye oḍok senena unre Joseph bõsrenko lạgitʼ noa porob do mitʼṭen goha lekateye teṅgokeda. Ar iń do mitʼṭecʼ bạń baḍae akatʼ pạrsiń ańjomkeda.

⁶ Probhu Isore menkeda, “Gokʼ bhạriạ khon uniyakʼ bojhań rawalketʼtaea; ar khạclạkʼ khon uniyakʼ ti do khalasentaea.

⁷ Muhinrem paṛaoente ińem hohoạdińa ar iń doń bańcaoketʼmea; ar huḍur saḍe reakʼ danaṅ khoniń roṛ ruạṛatʼmea; ar Meriba reakʼ dakʼ ṭheniń biḍạuketʼmea. (Sela)

⁸ E ińren hoṛko, ińakʼ sontor katha ańjompe; E Israelko, ape do ińakʼ kathako luturakʼpe.

⁹ Aperen do jãhãn debotako aloko tahentape ma; ar eṭakʼ jạtren debotako ṭhen hõ amakʼ bohokʼ do alom kuḍbura.

¹⁰ Ińge Probhu, aperen Isor do; Ińge Misor disạm khon ape doń oḍok ạguakatʼpea. Apeakʼ moca cahabtape, ar iń doń ajoapea.

¹¹ Menkhan ińren hoṛko do bako luturatʼtińạ; Israel do iń tabere tahen bae rebenlena.

¹² Ona iạte onkoakʼ mon do kạṭhuạ lekageń dohokatʼtakoa, jemon onko do akoakʼ kusi lekako calao daṛeakʼ.

¹³ Hae, ińren hoṛko do eken iń tabereko tahẽlen khan, ar Israel do ińakʼ hortegeye taṛamle khan,

¹⁴ enḍekhan iń do onkoren bạirikoń kobojkekoa, ar onkoren bạiriko upạrte ińakʼ tiyiń rakapʼkea.

¹⁵ “Bạiriko do iń samaṅre kiṛdhum akanko tahena, onko do jaejug hạbicʼko sạjạiyokʼa.

¹⁶ Menkhan Israel do sanam khon soros utạrakʼ guhumiń jom ocoyea; sạrige iń do ona rasateń tirpit ocokoa one okaṭakʼ do cạṭạni khon ńamokʼkan.”