Sereńko 80 - সান্তালী বাইবেল

Disom rukhiyạkʼ lạgitʼ koejoṅ.

¹ E Israelren gupiyicʼ, am do aleakʼ katha luturakʼme; am do Joseph bõsrenko bhiḍi pal lekam ạyuretʼkoa. Am, one Kerub cetanrem duṛupʼ akan, ar amakʼ marsal baṛe bamber ocoyme.

² Am do Ephrayim, Benjạmin ar Manasi samaṅre amakʼ daṛe rakapʼ ocoytam ar ale bańcaole lạgitʼ dela hijukʼme.

³ E Isor, lahate leka rakapʼ ruạṛlem; amakʼ daya reakʼ marsal do ale cetanre paṛaokʼma, onate ale do bańcaole ńama.

⁴ E sanam daṛeanicʼ Probhu Isor, amren hoṛkoakʼ koejoṅakʼre ar tinạkʼ din edre akanem tahena?

⁵ Jomakʼ jinis lekate am do mẽtʼ dakʼem jom ocoakatʼkoa ar bạṭi bạṭi mẽtʼ dakʼem ńũ ocoakatʼkoa.

⁶ Am dom nonka akada jemon aḍepase jạtrenko ale iạteko tapam arko jhogṛakʼ. Aleren bạiriko do ale iạte ako talareko landa joṅkana.

⁷ E sanam daṛeanicʼ Isor, am do lahate leka beretʼleme; amakʼ daya reakʼ marsal do ale cetanre paṛaokʼma, onate ale do bańcaole ńama.

⁸ Am do mitʼṭen darkha nạ̃ṛĩ leka Misor disạm khonem uṭhạu ạguakatʼlea; ar am do eṭakʼ jạtrenkom laga ńirketʼkote onḍem rohoeketʼlea.

⁹ Am do ona lạgitʼ jumim saphakeda; ar ona reakʼ rehetʼ do otre bạisạuente goṭa disạm pasnaoena.

¹⁰ Ona reakʼ umulte buru boṭkocʼko umulena; ar ona reakʼ ḍạrkote usul usul husupʼ darekoe pasnaokeda.

¹¹ Doreão hạbicʼ uni do acʼakʼ ḍạrkoe pasnaoketʼtaea ar Uphreṭis gaḍa hạbicʼ acʼakʼ kahleko hõ.

¹² Cedakʼ ona rurukhiyạ pạcri dom rạputʼ giḍikada, horte sen paromokʼkan sanamkoge coṅ ona reakʼmako gotʼetʼ tahẽkan?

¹³ Birren sukri do hecʼkate onae togocʼ topakʼeda; ar ṭạnḍiren janwarko hõ onako jomeda.

¹⁴ E sanam daṛeanicʼ Isor, am do ruạṛ hijukʼme; serma khon oyoṅkate ńelme ar noa darkha nạ̃ṛĩ baṛe hiri idiyme.

¹⁵ Okako poha do amakʼ titem rohoe akatʼ, ar okaṭakʼ reakʼ ḍạr do am lạgitʼem daṛe ocoakatʼ;

¹⁶ ona dare do seṅgelte atar akana, ar makʼgiḍi akana; amren hoṛko do ińakʼ eger iạteko nosṭo akana.

¹⁷ Amem bachao akawan hoṛko cetanre amakʼ ti dohoyme; ar apnar lạgitʼem bachao akade manwa cetanre hõ amakʼ ti dohoytam.

¹⁸ Enḍekhan ar am ṭhen khon bale ruạṛ calakʼa; am do arhõm jiwetʼ ruạṛlea, ar ale do amakʼ ńutumle dohaeyakʼtama.

¹⁹ E sanam daṛeanicʼ Probhu Isor, am do lahate leka beretʼ ruạṛlem; ar amakʼ daya reakʼ marsal do ale cetanre paṛaokʼma, onate ale do bańcaole ńama.