Sereńko 8 - সান্তালী বাইবেল

Isorakʼ ṭhonok ar manwawakʼ man

¹ E Probhu Isor, E aleren kisạ̃ṛ, goṭa dhạrtige amakʼ ṭhonokte perecʼ akana; ar sermare amakʼ ṭhonokem bạisạu akada.

² Bale gidrạko ar toa nunuko reakʼ moca khon am do daṛe reakʼ gaṛem hoyocoakada; amren bạiriko lạgitʼge noa dom onka akada, jemon amren bạiriko ar hala hạkʼlikan kom kiṛdhum daṛeako.

³ Iń do amakʼ tite benaoakʼ serma secʼiń beṅgetʼeda ar onḍem ṭarhao akatʼko ńindạ cando ar ipilkoń ńeletʼkoa.

⁴ Unreń hudisa, manwa doe celekante, uni reakʼem dạndikʼkana? Ar Manwa Hopon baṅe celekan, onate uniyakʼ kom moneyakʼkana?

⁵ Manwa do serma goḍet khon thoṛaganem huḍiń akadea; uni do ṭhonok ar manot reakʼ mukuṭem horokʼ akawadea.

⁶ Amakʼ tite sirjạu reakʼ cakʼlao bhar do unigem emakawadea ar noako jotowakʼ do uniyakʼ jaṅga latarrem dohoakada.

⁷ Ḍaṅgra ar bhiḍi palrenko ar dhạrtiren eṭakʼ sanam janwarko,

⁸ ar coṭre uḍạukʼkan cẽṛẽko, ar jalapuriren hakoko ar jalapurire ạcur baṛaekan sanam jiwiyanko hõ.

⁹ E Probhu Isor, aleren kisạ̃ṛ, goṭa dhạrtige amakʼ ṭhonokte perecʼ akana.