Sereńko 79 - সান্তালী বাইবেল

Disạm rukhiyạkʼ lạgitʼ koejoṅ

¹ E Isor, eṭakʼ jạtrenko do amakʼ sompottiko hat akada, ar onko do onḍeko bolo akana; amakʼ sonot oṛakʼko bhõnḍ akada; ar Jerusalem do maraokʼ reakʼ dhiri puńjirko hoyoco akada.

² Amren golamkoakʼ mạ̃ṛĩko do coṭren cẽṛẽko jom ocoakatʼkoa; ar am botoramkoakʼ jel do otren janwarkoko ematʼkoa.

³ Jerusalem beṛhaete onko do dakʼ leka onkoakʼ mãyãmko dul giḍikada; ar onko baeko leka do okoe hõ bạnukʼkoa.

⁴ Ale do aḍepase jạtrenko ṭhen lelhagele hoyakana, ar ale beṛhaeten hoṛko ṭhen do landa dhutʼren hoṛle hoyakana.

⁵ E Probhu Isor, ar tinạkʼ din? Am do cetʼ jaejugge edre akanem tahena? Ar tinạkʼ din amakʼ ãṭokʼ reakʼ jala do seṅgel leka jolokʼtege tahena?

⁶ Okoe bako manaome onko jạtrenko cetanre am do amakʼ edre upʼakome, ar onako rajosṭi cetanrehõ onkaeme okoe do amakʼ ńutum bako dohaeyakʼkan;

⁷ ente onkoge Jakobren bõs doko caba akatʼkoa ar uniyakʼ tahen ṭhạ̃i hõko marao akada.

⁸ Sedaeren hapṛamkoakʼ behokakʼ do alere alom paṛao ocoya; am do usạrage amakʼ dulạṛ udugme, ente ale do ạḍitetʼle botorokʼ kana.

⁹ E aleren babańcaoicʼren Isor, amakʼ ṭhonok lạgitʼge goṛowaleme baṛe; amakʼ ńutum bahaokʼ lạgitʼge bańcaoleme ar aleakʼ kạiko ikạ kataleme.

¹⁰ Eṭakʼ jạtrenko do cedakʼko mena, “Okateye calaoena onkoren Isor do?” Onko do ale samaṅrege baḍae ocokom, amren golamkoakʼ mãyãm reakʼ dom hala ruạṛgea mente.

¹¹ Bondi akankoakʼ geraṅ do amakʼ luturre bajaokʼma; ar okoeko cetanre gujukʼ reakʼ ray em hoyakan onko do amakʼ maraṅ daṛete baṛe bańcaokome.

¹² E Probhu Isor, ale aḍepase jạtrenko do oka leka aleko henostawale kana, ona reakʼ eae doboṛ sạjại baṛe hala ruạṛakome.

¹³ Enḍekhan ale, amren hoṛ, okoe do gupi ṭạnḍiren bhiḍiko kanle, ale do jaejug hạbicʼle gun manao joharama ar piṛhi cetan piṛhi le sarhaomea.