Sereńko 78 - সান্তালী বাইবেল

Isor ar uniren hoṛko

¹ E iń jạtren hoṛko, ińakʼ binti ańjomtińpe; ar ińakʼ moca reakʼ kathako luturakʼpe.

² Iń do mocate kạhtukkoń roṛa; ar sedae reakʼ kukmũkoń phuṭạua.

³ Abo do noako katha bon ańjom akada arbon baḍaegea, ar aboren hapṛamko hõ abo ṭhenko lại oṭoakada.

⁴ Onkoren bõsko ṭhen ona do babon oko dohokakʼa; abo do tayom piṛhirenko ṭhen Probhu Isorakʼ sarhaoanakʼ kạmi reakʼ katha bon lạiya; ar uniyakʼ daṛe reakʼ katha ar uni okako hahaṛa kạmiye kạmiakatʼ ona reakʼ katha hõ bon lạiya.

⁵ Uni do Jakob bõsrenko cetanre acʼakʼ hukume teṅgokeda, Israel jạtrenko lạgitʼ uniyakʼ ạn ạrikoe bandhaokeda; ona ạn ạriko akoren gidrạko cetʼako lạgitʼ uni do aboren hapṛamkoe hukumatʼko tahẽkana,

⁶ jemon tayom piṛhirenko hõ onako baḍae daṛeakʼ ar akoren gidrạko ṭhen onako lại daṛeakʼ.

⁷ Enḍekhan onko do Isorreko bhorsakʼa; ar uniyakʼ kạmiko hõ bako hiṛińa menkhan uniyakʼ hukumko dohoytaea.

⁸ Onate onkoren hapṛamko leka onko do ṭenḍos ar huhulko do bako hoyokʼa; onko hapṛamkoakʼ ontor do Isor secʼ pạtiạr baṅ tahekana ar mon hõ baṅ tahẽkantakoa.

⁹ Ephrayim hoponko do dhinkiạko tahẽkanre hõ lạṛhại hilokʼ doko pạc ruạṛlena.

¹⁰ Onko do Isorakʼ bondobos bako manaoleda, ar uniyakʼ ạn ạriko leka calakʼ hõ bako aṅgocleda.

¹¹ Uni cetʼe cekaletʼ ona doko hiṛińkeda, onko do uniyakʼ hahaṛa kạmi reakʼ kathako hiṛińkeda one okaṭakʼ onkoe udukʼatʼko tahẽkan.

¹² Israelren hapṛamkoakʼ mẽtʼãhã samaṅre uni do hahaṛa kạmiye kạmileda; Misor disạmre ar Soan ṭoṭhare uni do onakoe kạmileda.

¹³ Uni do jalapuriye bar hạṭińletʼte ona talate onkoe parom idiletʼkoa; uni do dakʼko ḍhipi lekae teṅgo ocoleda.

¹⁴ Siń do rimilte ar ńindạ do seṅgel reakʼ marsalte onko do hore udukʼ idiyakokan tahẽkana.

¹⁵ Hahaṅkarre dhiri paṛakʼ ocokate hasa latar khon onko do dakʼe ńũ ocoletʼkoa.

¹⁶ Buru lekan dhiri khon uni do dakʼ jharnae oḍok ocoleda; ona dakʼ do gaḍa dakʼ lekageye ạtu ocoleda.

¹⁷ Menkhan onko do uni upạrte kạkạitegeko tahẽyena; maraṅ Isor upạrte hahaṅkarre onko doko hulkeda.

¹⁸ Onko do akoakʼ sana leka jomakʼ reakʼ khojkate mon monte Isorko biḍạukedea.

¹⁹ Onko do Isor upạrte noa kathako menkeda, “Hahaṅkarre Isorakʼ do cetʼ jomakʼte ṭebile sajao daṛeakʼa?

²⁰ Uni do dhiriye dalkeda ar ona khon dakʼ bumbhạu oḍokena; onate cetʼ uni do piṭhạ hõe em daṛeabona? Uni do cetʼ acʼren hoṛko lạgitʼ jele juṛạu daṛeakʼa?

²¹ Noa katha ańjomkate Probhu Isor doe edreyena. Jakob upạrte uniyakʼ ontorre seṅgel do jolena, Israel upạrte uniyakʼ edre do caṛhaoena;

²² ente Isorre onko do bako pạtiạulena; uni do onkoe bańcao daṛeakoa mente ona kathare hõ bako bhorsalena.

²³ Enhõ uni do coṭ sermae hukumada ar serma reakʼ duạre jhicʼkeda.

²⁴ Hoṛkoakʼ jomakʼ lạgitʼ uni do dakʼ leka Mannae jạṛiyatʼkoa. Ar serma reakʼ phosolgeye ematʼkoa.

²⁵ Serma goḍetkoakʼ jomakʼ do manwako jomkeda; ar tinạkʼko jom daṛeakʼ unạkʼge onkoe kolatʼkoa.

²⁶ Uni do serma khon puruạ reakʼ hoeye hoyocokeda; uni do acʼakʼ daṛete dạkhin reakʼ hoeye ạyur ạgukeda.

²⁷ Uni do dhuṛi lekage jele jạṛiyatʼkoa, jalapuri reakʼ gitil leka cẽṛẽye jạṛiyatʼkoa.

²⁸ Onkoakʼ ḍerakore, ar onkoakʼ tạmbu beṛhaete uni do onkoe pheḍ ocoketʼkoa.

²⁹ Onko do lacʼ bikʼko jomkeda; ar okaṭakʼko khojletʼ onageye ematʼkoa.

³⁰ Ar okaṭakʼ jomakʼ jomko menletʼ ona ạuri cabakʼrege se, onkoakʼ mocare ona tahẽnrege

³¹ Isorakʼ edre do onko upạrte rakapʼena. Uni do onkoren thoṛa daṛean juạnkoe gocʼketʼkoa; Israelren soros utạr hoṛko do acʼakʼ tabereye ạguketʼkoa.

³² Enrehõ onko do kạkạitegeko tahẽyena, uniyakʼ hahaṛa kạmiko ńelkatere hõ bako pạtiạulena.

³³ Onate onkoakʼ din do ạuṛiyakʼtegeye cabaketʼtakoa. Ar bochorko do torastege.

³⁴ Uni do onkoe gocʼketʼko tayom sarecʼ hoṛko do uniyakʼ kathako disạkeda; onko do arhõ uni secʼko ạcur ruạṛena ar jitkate uniko ńam baṛakedea.

³⁵ Onko doko disạkeda Isor kangeae onkoren aotan buru, ar maraṅ Isorge onkoren chakʼḍaoicʼ.

³⁶ Menkhan onko do unre mocateko luhum suhumkeda, ar alaṅte eṛe kathako roṛkeda.

³⁷ Onkoakʼ ontor do unire uricʼ baṅ tahẽkana; ar uniyakʼ bondobosre onko do pạtiạr bako tahẽkana.

³⁸ Enhõ uni do mãyãteye perecʼgete onkoakʼ bedhoromakʼkoe ikạketʼtakoa, onko do bae marao giḍiletʼkoa; acʼakʼ edre do ghane ghạṛicʼe dobnaoketʼtaea, uniyakʼ edre do baṅ sarsao rakapʼlena.

³⁹ Uni doe hudiskeda onko do eken manwa kanako, onko do oṭaṅokʼkan hoeleka ar bako ruạṛa.

⁴⁰ Hahaṅkarre samani dhao uni upạrteko hulleda, ar ona hahaṅkarre samani dhao uniko duk ocokedea?

⁴¹ Onko do ghane ghane Isorko biḍạukedea, ar Israelren uni sonoticʼko duk ocokedea.

⁴² Onko do uniyakʼ daṛe reakʼ katha bako disạ doholeda; ar ona din reakʼ katha do bako disạ dohoakada one oka hilokʼ bạirikoakʼ ti khone chaḍaoletʼko tahẽkan,

⁴³ uni do Misorre cinhại udukʼatʼko tahẽkanre ar Soan ṭoṭhare hahaṛa kạmiye kạmiletʼre.

⁴⁴ Onkoakʼ sanam gaḍa reakʼ dakʼe mãyãm ocoletʼtakoa. Ar ona dakʼ do bako ńu daṛeada.

⁴⁵ Onko ṭhen uni do kãṛã loṭocʼe kolketʼkoa, onko do onkoko ger gocʼ cabaketʼkoa. Uni do roṭekoe kolketʼkoa, onko do onkoko jalao thakaoketʼkoa.

⁴⁶ Onkoakʼ aṛakʼ sakamko do tejokoe ematʼkoa ar onkoakʼ phosol do pohokoe ematʼkoa.

⁴⁷ Arel dakʼte onkoakʼ darkha nạ̃ṛĩkoe bạṛicʼketʼtakoa; ar sisirte do loa darekoe nosṭoketʼtakoa.

⁴⁸ Uni do arel dakʼte onkoren ḍaṅgrakoe maraoketʼkoa ar ceṭerte onkoren janwar palkoe maraoketʼkoa.

⁴⁹ Uni do onko upạrte acʼakʼ jolokʼkan edre ar duk kosṭoe kolkeda; ona do maraokʼreye bahal akatʼko mitʼ dol goḍet leka hoyena.

⁵⁰ Uni do acʼakʼ edre sodorokʼ hor reakʼ tạkicʼakʼkoe ocokʼkeda; uni do gocʼ khon bae rehayletʼkoa menkhan mahamạri ṭhene alaeketʼkoa.

⁵¹ Uni do Misor disạmren mitʼke mitʼ pạhil koṛa hoponkoe gocʼketʼkoa, uni do Ham bõsrenko reakʼ tạmburen ar daṛe juạnko hõe gocʼketʼkoa.

⁵² Noa tayom acʼren hoṛko do bhiḍi lekae oḍok ạguketʼkoa, ar hahaṅkar talate bhiḍi pal leka uni doe ạyurketʼkoa.

⁵³ Uni do nirạiteye ạguketʼkoa, onate onko do bako botorlena; menkhan jalapuri do onkoren bạirikoe utʼgotʼkatʼkoa.

⁵⁴ Mucạtʼre uni do acʼakʼ sonot disạmteye seṭerketʼkoa, ạguketʼkoae ona buru lodam disạmte oka disạm do acʼakʼ daṛeanakʼ titeye hatletʼ tahẽkan.

⁵⁵ Onko samaṅ khon porjạtren koe laga ńirketʼkoa, ar onkoakʼ jaega jumi soṅkate sompotti lekate onkoe hạṭińatʼkoa; onkoakʼ oṛakʼ duạrre Israel bõsrenkoe girobas ocoketʼkoa.

⁵⁶ Menkhan enrehõ onko do maraṅ Isorko biḍạukedea ar uni upạrteko hulkeda; ar uniyakʼ hukum do bako manaoleda.

⁵⁷ Onkoren hapṛamko lekage ṭhik hor khon ocokʼkate onko doko behokkeda; onko do peṛta akʼ lekako konḍeayena.

⁵⁸ Onko do buru coṭ reakʼ pinḍko beoharkate uniko bekusi ocokedea; ar tite benaoakʼ murtiko pujạwatʼkote uniko edre ocokedea.

⁵⁹ Noako ńelte Isor do ạḍiye edreyena; uni do Israelko ar bae luturatʼkoa.

⁶⁰ Siloamre acʼakʼ okaṭakʼ kumbạ oṛakʼ tahẽkan onae bạgi oṭowada; noa do ona tạmbu kana one okaṭakʼ do manwa talareye benaoletʼ.

⁶¹ Uniyakʼ daṛe reakʼ cinhạ do bondi dosa oktereye kolleda; uniyakʼ ṭhonok reakʼ cinhạ do uniren bạirikoakʼ tireye emkeda.

⁶² Acʼren hoṛko uni do bạirikoakʼ tarwaṛereye dohoketʼkoa; acʼren hoṛko cetanre uniyakʼ edre do paṛaoena.

⁶³ Seṅgelte onkoren juạnkoe gocʼketʼkoa; ar onkoren kũạ̃ri kuṛiko lạgitʼ bapla sereń do baṅ hoylena.

⁶⁴ Tarwaṛete onkoren ạyurko doe gocʼketʼkoa; ar onkoren rạnḍi maejiuko do ar bako homor halaṅ daṛeada.

⁶⁵ Ona tayom Probhu Isor do jạpitʼ khone ebhenena; uni do darkha rasa reakʼ nisạ kaṭaoen bir lekae jagwarena.

⁶⁶ Uni do acʼren bạirikoe pạc ocoketʼkoa; onko do jaejug lạgitʼe opomanketʼkoa.

⁶⁷ Tayomte uni do Josephakʼ bõse hirikeda, ar Ephrayem gusṭirenko do bae bachaoana;

⁶⁸ Menkhan Jihudi bõsrenkoakʼ ṭhạ̃igeye bachaoana one okaṭakʼ Sion buru uni doe dulạṛetʼ tahẽkan.

⁶⁹ Onḍe uni do acʼakʼ sonot oṛakʼ usulgeye benaokeda, ona do serma ṭuṅgạu hạbicʼge tahẽkana; uni do dhạrti lekage onae benaokeda.

⁷⁰ Uni do acʼren golam Dạude bachaokedea, uni bhiḍi khạṛ khon hijukʼicʼge;

⁷¹ Uni do toa emokʼkan bhiḍiko ńel todarotko kạmi khone ạgukedea, jemon uni do Probhu Isorren hoṛko, metakʼme Jakob bõsrenko, okoe do uniyakʼ sompotti onko Israel jạtrenkoe gupi daṛeako.

⁷² Uni do acʼakʼ ontor reakʼ dhoromtetʼ lekageye gupiketʼkoa; Ar gạkhuṛ titeye ạyur idiketʼkoa.