Sereńko 77 - সান্তালী বাইবেল

Duk oktere jiwi raṛecʼ

¹ Iń do ãṭ aṛaṅte Isor ṭheniń rakʼeda; ar ãṭ aṛaṅteń guhereda jemon uni doe luturakʼtiń.

² Iń do muhinre Probhu Isoriń hohoadea; ar ńindạ jokhecʼ ińakʼ ti do Isor secʼ tul akan tahẽkana, ar iń do bạń laṅgakʼkan tahẽkana; ar ińakʼ ontor do jiwi raṛecʼ bae ńametʼ tahẽkana.

³ Iń do tinre Isorakʼ kathań hudisokʼkan tahẽkan unre dukteń khadbadaokʼkan tahẽkana; ar hudis hudiste iń doń loraokʼkan tahẽkana. (Sela)

⁴ Amge ińakʼ mẽtʼ do beṅgetʼem dohoyetʼtiń tahẽkana; ar iń do ạḍiń ạndukʼ mạndugok ʼkan tahẽkana, ar onate katha hõ bạń roṛ daṛeakʼkan tahẽkana.

⁵ Sedaeakʼ kathakoge iń doń hudisokʼkan tahẽkana, hudisokʼkan tahẽkạnạń ḍher bochor laha reakʼ kathakoge.

⁶ Ńindạ jokhecʼ ińakʼ sereń reakʼ joto kathako disạ hecʼạńkan tahẽkana; ar iń do ontorreń ganḍonokʼ kan tahẽkana ar mon monteń ḍunḍhạuetʼ tahẽkana.

⁷ Probhu Isor do cetʼ jaejug hạbicʼgeye bạgi giḍiyatʼbona? Uni do cetʼ ar tisge bae daya abona?

⁸ Uniyakʼ asambheṛ daya do cetʼ jaejug lạgitʼ caba utạrena? Ar uniyakʼ gokʼakʼ hõ cetʼ mạutạ utạrokʼa?

⁹ Isor do cetʼ dayakʼe hiṛińkeda? Uni do cetʼ edre iạte acʼakʼ dayaye bond dohoakada?

¹⁰ Ińiń menkeda, “Noakangea ińakʼ duk do, maraṅ Isorakʼ jojomti hõ bodol akantaea.”

¹¹ Probhu Isorakʼ sanam kạmiko reakʼ kathań disạ dohoya; hẽ, sedae reakʼ amakʼ hahaṛa kạmi reakʼ kathakoń disạya.

¹² Amakʼ sanam kạmiko reaṅiń dhena; ar amakʼ sanam kạmi reakʼ kathakoń ganḍonjoṅa.

¹³ E Isor, amakʼ calakʼ hor do sonotgea; aboren Isor lekan maraṅ do cetʼ ar jãhãe debota menakʼkoa?

¹⁴ Amge uni Isor do one hahaṛawakʼkom kạmikan; ar sanam jạtrenko talare amge amakʼ daṛeyem sodor akatʼtama.

¹⁵ Am do amren hoṛ Jakob ar Josephren bõsko amakʼ daṛe titem chaḍao akatʼkoa. (Sela)

¹⁶ E Isor, jalapuri reakʼ dakʼ do amko ńeletʼmea; am ńelte dakʼko do botorena, ar ona athantar dakʼ do daldalaoena.

¹⁷ Rimil do dakʼe emena, ar sermare rimil saḍeyena; amakʼ sarko hõ onte note calaoena.

¹⁸ Amakʼ huḍur reakʼ saḍe do birbãore ańjomena, amakʼ bijli reakʼ malkaote dhạrti doe marsalkeda; dhạrti do dal malaoena ar thar tharaoena.

¹⁹ Am do jalapuri talatem horleda, ar athantar dakʼ talatem ḍaharleda, menkhan amakʼ jaṅga reakʼ cinhạ do baṅ ńellena.

²⁰ Mose ar Aron hotete bhiḍi pal leka am do amren hoṛkom ạyurletʼkoa.